Të dërguarit specialë të presidentit amerikan Donald Trump, Steve Witkoff dhe Jared Kushner, pritet të zhvillojnë vizitën e tyre të parë në Kiev, në një hap që synon të ringjallë përpjekjet diplomatike për t’i dhënë fund luftës në Ukrainë. Sipas Financial Times, që citon burime të njohura me diskutimet në Shtëpinë e Bardhë, mundësia e kësaj vizite u diskutua gjatë takimit mes presidentit amerikan dhe homologut të tij ukrainas, Volodymyr Zelensky.
Në Kiev, vizita shikohet si mundësi për të forcuar marrëdhëniet me administratën amerikane dhe për të siguruar mbështetje të re ushtarake nga Shtetet e Bashkuara gjatë mandatit të dytë të Trump. Presidenti ukrainas konfirmoi, në një intervistë për Axios, se Witkoff dhe Kushner mund të mbërrijnë në Kiev brenda dy javëve të ardhshme, duke e cilësuar këtë si një nga rezultatet konkrete të takimit të fundit me presidentin amerikan.
Nëse realizohet, kjo do të jetë vizita e parë e dy zyrtarëve amerikanë në Ukrainë, pas disa udhëtimeve që ata kanë zhvilluar më herët në Rusi. Zelensky tha se synon të diskutojë me ta mundësinë e rifillimit të bisedimeve të paqes me Rusinë, si dhe t’u tregojë nga afër situatën në terren dhe pasojat e luftës.
Sipas presidentit ukrainas, Witkoff dhe Kushner mbështesin idenë e një armëpushimi që mund të krijojë kushtet për një proces diplomatik, por ai u shpreh skeptik se presidenti rus Vladimir Putin do ta pranonte një pezullim të luftimeve. Megjithatë, Zelensky ritheksoi gatishmërinë e Ukrainës për të rifilluar negociatat e paqes me Rusinë, me synimin për t’i dhënë fund konfliktit që vazhdon prej më shumë se katër vitesh.
