Më shumë se gjysma e territorit të Anglisë është në gjendje thatësire, pasi vendi po përballet me një nga periudhat më të thata të regjistruara ndonjëherë. Agjencia Kombëtare e Mjedisit njoftoi se korriku është muaji më i thatë në histori, ndërsa reshjet kanë rënë në nivele rekord. Të dhënat tregojnë se reshjet kanë qenë vetëm 7% e nivelit normal për këtë periudhë të vitit, ndërsa në jug të Anglisë kanë arritur vetëm 1% të mesatares sezonale.
Një zonë e gjerë që përfshin Anglinë qendrore, lindore dhe jugore po përjeton një “thatësirë të papritur”, e zhvilluar me shpejtësi për shkak të mungesës së reshjeve dhe temperaturave të larta. Në gjendje thatësire janë shpallur Anglia Lindore, Hertfordshire, Londra e Madhe, Lugina e Thames, Hampshire, Wye, Devon, Cornwall dhe Midlands Perëndimore. Edhe pjesa tjetër e vendit po përballet me kushte të zgjatura thatësire.
Agjencia paralajmëron se nivelet e lumenjve dhe përrenjve po bien ndjeshëm; fermerët po detyrohen të përshpejtojnë korrjet; rreziku i zjarreve është rritur; dhe miliona banorë po kufizojnë konsumin e ujit. “Aktualisht po e përdorim ujin më shpejt sesa natyra mund ta rimbushë. Vala e dytë radhazi e thatësirës, pas asaj të vitit 2025, po krijon një situatë jashtëzakonisht serioze me pasoja afatgjata për mjedisin, jetën e egër dhe ekonominë”, deklaroi Helen Wham, drejtoreshë për burimet ujore dhe kryetare e Komitetit Kombëtar të Thatësirës.
Pas mbledhjes së komitetit, autoritetet i kanë bërë thirrje kompanive të furnizimit me ujë të përshpejtojnë riparimin e rrjedhjeve në rrjet për të reduktuar humbjet e ujit. Anglia ka përjetuar tre valë të njëpasnjëshme të të nxehtit që nga maji, ndërsa një valë e katërt është aktualisht në zhvillim. Qershori ishte muaji më i nxehtë i regjistruar që prej vitit 1884; temperaturat rekord detyruan mbylljen e disa shkollave dhe shkaktuan ndërprerje në transport. Rekordi më i lartë u regjistrua më 26 qershor në Lingwood, në lindje të Anglisë, ku termometri shënoi 38 gradë Celsius.
