Gjyqi ndaj ish-presidentit Ilir Meta dhe Monika Kryemadhit u ndërpre për një pushim të shkurtër dhe pritet të rinisë. Gjatë pauzës, Monika Kryemadhi doli jashtë ambienteve të SPAK dhe shkëmbeu replika me protestues dhe mbështetës që ishin mbledhur aty.
Ajo iu drejtua protestuesve me thirrjen: “Mos u dorëzoni, se ai vdes vetëm nga rezistenca”, duke i lutur të mos përçahen dhe duke përsëritur mesazhin e qëndrimit të bashkuar. Në bisedë Kryemadhi shprehu se besimi dhe shpresa vazhdojnë edhe pas vdekjes: “Është një cikël që do mbarojë. Besimi dhe shpresa… vdes njeriu dhe ato vazhdojnë akoma.” Kur një qytetar shprehu se e kishte humbur shpresën tek të tjerët, Kryemadhi iu përgjigj se as ajo nuk ka shpresë tek ata, por e ka shpresën te Zoti: “Unë shpresën e kam te Zoti lart në qiell. Besoni te vetja juaj, se të tjerët do ju shkelin me këmbë. Vetëm vetja nuk të shkel me këmbë.” Ajo shtoi se në këtë botë njerëzit e duan me interes dhe vuri në dukje se vetëm prindërit nuk e bëjnë këtë për interesa.
Biseda u shoqërua edhe me komente më lehtë shtruese mes Kryemadhit dhe qytetarëve rreth pamjes, ku Kryemadhi tha se kishte qenë “shumë e shëmtuar e re” dhe më pas se përsëri ndihej e shëmtuar tani. Një qytetar e quajti “super milf”, ndërsa Kryemadhi pyeti nëse ai ishte në protestë — qytetari u përgjigj “Po” dhe Kryemadhi përsëriti: “Mos u dorëzoni, se ai vdes vetëm nga rezistenca.”
Në diskutim u ngrit edhe kërkesa për hetime: një qytetar kërkoi që të hetoheshin të gjithë ata që kanë qenë pjesë e politikës shqiptare “që nga viti 1990 deri në vitin 2026.” Kryemadhi u shpreh se duhet të hetoheshin “të gjithë pa përjashtim, edhe të brendshmet t’u hetojnë,” duke shtuar thirrjen për unitet: “Vetëm ‘stay strong’, çuna, dhe mos u përçani. Po ndenjët të bashkuar, e mbytët.”
