BTS njoftoi se nuk do të paraqesë muzikën e tij për shqyrtim në çmimet Grammy 2027, vendim që shkaktoi reagime te fansat dhe në industrinë e muzikës. Deklarata e njëjtë u publikua nga të shtatë anëtarët në rrjetet sociale, ku grupi shpjegoi se dëshiron që muzika të vlerësohet për atë që është dhe jo të ndahet sipas rajonit apo gjuhës.
Vendimi u mor një muaj pas njoftimit të Akademisë së Regjistrimit për krijimin e një kategorie të re për performancën më të mirë të muzikës pop aziatike, ndryshim që ka nxitur reagime të përziera brenda komunitetit K-Pop. Sipas rregullave të Grammy-t, këngët në këtë kategori duhet të përmbajnë përdorim të konsiderueshëm të një gjuhe aziatike. Megjithatë, albumi i fundit i BTS, “Arirang”, dhe kënga kryesore “Swim” janë kryesisht në gjuhën angleze, çka do ta përjashtonte grupin nga kjo kategori.
Pritshmëritë ishin që BTS të konkurrojë për disa nga çmimet kryesore të Grammy-t, përfshirë albumin dhe këngën e vitit, pas rikthimit të tyre muzikor që u konsiderua një nga më të suksesshmit e vitit. Që nga viti 2020, grupi ka marrë pesë nominime për Grammy, por ende nuk ka fituar ndonjë çmim. BTS ishte grupi i parë K-Pop që mori një nominim në Grammy me këngën “Dynamite” në vitin 2021.
Vendimi i grupit vjen në një kohë kur Grammy-t po përpiqen të rrisin përfaqësimin e muzikës aziatike. Megjithatë, disa artistë dhe fansa kanë shprehur shqetësime se krijimi i kategorive të reja mund të sjellë ndarje midis artistëve në vend që t’i bashkojë ata. Lëvizja e BTS, e komunikuar njëzëri nga anëtarët, ka nxitur diskutime mbi mënyrën se si institucionet e mëdha të muzikës trajtojnë zhanret dhe prodhimet nga rajone dhe gjuhë të ndryshme.
