Partia Demokratike ka paditur në Gjykatën Kushtetuese ligjin për marrëveshjen e huasë prej 302 milionë eurosh mes Shqipërisë dhe Shteteve të Bashkuara për blerjen e pajisjeve ushtarake. Kreu i Grupit Parlamentar të PD-së, Gazment Bardhi, sqaroi se opozita nuk kundërshton marrëveshjen në parim, por procedurën e miratimit të saj në Kuvend.
Bardhi deklaroi se shumica parlamentare ka shkelur Kushtetutën dhe standardet e vendosura nga Gjykata Kushtetuese, duke mos i dhënë deputetëve kohën dhe mundësinë për t’u njohur me përmbajtjen e marrëveshjes dhe për të ushtruar funksionet e tyre parlamentare. Ai tha se Grupi Parlamentar i PD-së ka identifikuar shtatë shkelje kushtetuese, përfshirë mungesën e aksesit të deputetëve në dokumentacionin e plotë, mosrespektimin e afateve parlamentare, përdorimin e procedurës së përshpejtuar dhe mungesën e transparencës për shkak të klasifikimit të marrëveshjes.
Sipas Bardhit, marrëveshja nuk duhej të miratohej në procedurë të përshpejtuar, pasi qeveria kishte kohë ta ndiqte rrugën normale parlamentare. Ai theksoi se problemi nuk është marrëveshja, por mënyra antikushtetuese se si shumica vendosi ta miratonte atë, dhe akuzoi mazhorancën për cenuar të drejtat e opozitës dhe të deputetëve. PD kërkon nga Gjykata Kushtetuese shfuqizimin e ligjit ratifikues dhe pezullimin e tij deri në shqyrtimin e çështjes.
Marrëveshja me SHBA-në parashikon një hua prej 302 milionë eurosh për modernizimin e kapaciteteve ushtarake të Shqipërisë dhe pajisjen e Forcave të Armatosura. Partia Demokratike ka shprehur mbështetje për forcimin e mbrojtjes dhe për marrëdhëniet strategjike me Shtetet e Bashkuara, por thekson se procesi i miratimit duhet të zhvillohet në përputhje me Kushtetutën.
