Trajneri ra dakord të rikthehej vetëm të hënën në mbrëmje, duke u vënë menjëherë në dispozicion të Kombëtares dhe pranuar të ulë pagën nga 4 në 2 milionë euro në sezon. Roberto Mancini kuptoi se rikthimi në stolin e Azzurrëve ishte një mundësi reale vetëm pasi Giovanni Malagò mori situatën në dorë pas polemikave të fundjavës dhe mbylli kapitullin e Andrea Pirlos, pas dorëheqjeve të Maldinit dhe Leonardos. Kreu i Federatës besoi emrin që kishte preferuar që në fillim.
Në orët vendimtare Malagò telefonoi dy protagonistët që ishin me pushime — Mancini në Francë dhe Claudio Ranieri në Kalabri — dhe mori nga të dy një “PO” të menjëhershëm dhe gatishmëri të plotë për t’u angazhuar me Kombëtaren. Për Mancinin kjo shihet si mundësi revanshi pas largimit të tij drejt Arabisë Saudite verën e 2023-ës; për Ranierin është një shans tjetër pas “jo”-së që kishte dhënë një vit më parë kur i kishte dhënë përparësi Romës.
Të dy, të lirë nga detyrimet kontraktuale, nuk patën pengesa për të pranuar dhe treguan gatishmëri të jashtëzakonshme edhe në aspektin financiar, siç theksoi vetë Malagò në konferencën për shtyp të së martës. Corriere della Sera zbuloi shifrat: pagat janë të reduktuara ndjeshëm — për Mancinin një rrogë e përgjysmuar krahasuar me aventurën e tij të mëparshme me Kombëtaren, dhe për Ranierin një shkurtim i konsiderueshëm krahasuar me pagesën që mori si konsulent i Romës deri në prill. Para se të shkonte në Arabinë Saudite tre vjet më parë Mancini fitonte rreth 4 milionë euro në vit me Italinë, ndërsa Ranieri kalonte shifrën e 1 milion eurove në vit te Roma. Mancini kishte nënshkruar më pas kontratë prej 25 milionë eurosh në sezon për tre vite me Federatën Saudite, por prapëseprapë pranoi të kthehej.
Ranieri, sipas burimeve, gjatë pushimeve i ka thënë bashkëshortes “Nuk mund t’i them jo”. Telefonatat e Malagòs të hënën në mbrëmje aktivizuan menjëherë ekipin drejtues të Kombëtares, duke zgjidhur situatën e krijuar nga “çështja Pirlo”.
