Kongresisti amerikan Joe Wilson kërkon që Serbia të ndërpresë varësinë nga energjia ruse, të distancohet nga Rusia, Kina dhe Irani dhe të veprojë në përputhje të plotë me institucionet perëndimore. Në një intervistë për Shërbimin e Ballkanit të Radios Evropa e Lirë, ai rikonfirmoi mbështetjen për pavarësinë e Kosovës dhe kritikoi, siç tha, kërcënimet e vazhdueshme nga Serbia. Wilson tha se Beogradi duhet t’i bashkohet përfundimisht Bashkimit Evropian dhe NATO-s, por kjo kërkon një shkëputje të qartë nga pushtetet autoritare.
Ai ka sponsorizuar në Kongres një rezolutë që kërkon që Sesioni Vjetor i Asamblesë Parlamentare të OSBE-së për vitin 2027 të mbahet në Çarlston, Karolina e Jugut, e jo në Beograd, duke argumentuar se marrëdhëniet e Serbisë me Rusinë, Kinën dhe Iranin dhe qasja ndaj Kosovës janë shqetësuese për një nikoqir të këtij takimi. Asambleja Parlamentare e OSBE-së thekoi se delegacioni amerikan kishte njoftuar më parë se Çarlston nuk mund të organizonte sesionin dhe se më pas Beogradi u përzgjodh sipas procedurave të përcaktuara.
Wilson tha se shqetësimet logjistike për ushqimin, stafin dhe përkthimin në Çarlston janë zgjidhur dhe sugjeroi se Beogradi mund të organizojë takim të ngjashëm në vitin 2028. Ai vuri në dukje ndikimin e tepruar, sipas tij, të “kriminelit të luftës” Putin në Serbi, përfshirë blerjen e kompanisë shtetërore të naftës NIS, ndikimin e Partisë Komuniste kineze në komunikime dhe investime, dhe lidhjet me Teheranin. Wilson tha se negociatat për ndalimin e importit të naftës ruse nuk mjaftojnë; vendet, si Hungaria dhe Bullgaria sipas tij, po ndërmarrin hapa për të ndaluar financimin e Rusisë, dhe përmendi përpjekjet globale, përfshirë angazhimin e administratës së Trump me Indinë.
Nga udhëtimi i tij në Slloveni, ai përkujtoi sukseset e ish-republikave jugosllave dhe përsëriti se Serbia duhet të jetë pjesë e qytetërimit perëndimor. Wilson tha se synon të promovojë Shtetet e Bashkuara si vendin e duhur për Asamblenë Parlamentare të OSBE-së në vitin 2027 dhe vuri si kusht që nikoqiri të zvogëlojë ndikimin e Putinit, Partisë Komuniste Kineze dhe të elementeve nga Teherani.
