Belgjika, Turqia dhe Franca. Van Bommel, Montella dhe Zidane. Por mbi të gjitha, katër ndeshje brenda vetëm 10 ditëve që do të përcaktojnë menjëherë qasjen ndaj ciklit të ri.
Trajneri i ri i kombëtares italiane, Roberto Mancini, i prezantuar nga presidenti i FIGC-së Giovanni Malagò, do të përballet me një kalendar të ngjeshur në nisje të detyrës. Pas miqësoreve të qershorit kundër Luksemburgut dhe Greqisë me Silvio Baldinin në stol, mes fundit të shtatorit dhe fillimit të tetorit e presin katër sfida me peshë në Ligën e Kombeve.
Italia është shortuar në Grupin 1 të Ligës A dhe nis udhëtimin më 25 shtator në “Olimpico” të Romës kundër Belgjikës, e cila tani drejtohet nga Mark van Bommel pas shkarkimit të Rudi Garcia-s. Tri ditë më vonë, më 28 shtator, vjen transferta në Bursa për të përballuar Turqinë e Vincenzo Montella-s, me yjet Hakan Çalhanoğlu dhe Kenan Yıldız. Më 2 tetor skuadra udhëton në “Stade de France” për një tjetër përballje jashtë shtëpisë ndaj Francës së Zinedine Zidane. Cikli i kësaj pauze dyjavore mbyllet më 5 tetor në “Dall’Ara” të Bolonjës, përsëri përballë Turqisë.
Faza e grupeve do të përmbyllet më vonë në nëntor: më 11 nëntor në “San Siro” kundër Francës dhe më 15 nëntor në stadiumin “King Baudouin” të Brukselit, në shtëpinë e Belgjikës.
Liga e Kombeve shërben si paraqitje për kualifikueset e Kampionatit Evropian 2028. Sipas formatit të turneut, dy ekipet e para të çdo grupi kualifikohen për në çerekfinale, të cilat do të luhen në mars 2027. Vendi i tretë do të luajë një ndeshje “play-off” me një nga vendet e ngjitura nga Liga B për të qëndruar në elitën e Ligës A. Ndërsa skuadra që mbyll në vendin e fundit retrogradon drejtpërdrejt.