Këngëtarja amerikane Ariana Grande ka ngritur padi në Los Angeles kundër dy hakerëve të paidentifikuar, të akuzuar se kanë hyrë në mënyrë të paligjshme në pajisjet e bashkëpunëtorëve të saj dhe kanë vjedhur materiale të papublikuara muzikore, fotografi dhe video. Sipas dokumenteve gjyqësore, materialet e vjedhura më pas janë shitur në rrjetin e errët për shuma të konsiderueshme parash.
Padia përshkruan një seri incidentesh: vetëm gjatë vitit 2023 janë hakuar, vjedhur dhe publikuar 45 këngë të papublikuara të artistes. Avokatët e Grandes theksojnë se rrjedhje të ngjashme kanë ndodhur vazhdimisht që nga debutimi i saj në vitin 2011 dhe se qëllimi i padisë është identifikimi dhe mbajtja përgjegjëse e autorëve të këtyre shkeljeve.
Dokumentet përshkruajnë dy episode specifike të ndërhyrjeve kibernetike. Sipas padisë, në vitin 2025 hakerët fituan akses në telefonin celular të një producenti që bashkëpunonte me Granden, nga i cili morën master-e, demo dhe pamje të papublikuara nga seancat e regjistrimit. Një vit më parë, ata dyshohet se u paraqitën si fotografë përmes një adrese të rreme elektronike dhe arritën të siguronin fotografi të papublikuara të artistes nga një teknik dixhital.
Grande i akuzon të dyshuarit për shkelje të privatësisë, shkelje të ligjeve të Kalifornisë për hakimin e sistemeve kompjuterike dhe përvetësim të paligjshëm të materialeve. Në padi thuhet se veprimet e tyre kanë dëmtuar jo vetëm karrierën e saj, por edhe besimin që ekziston mes artistes dhe fansave.
Këngëtarja kishte reaguar më parë publikisht ndaj publikimit të materialeve të papërfunduara. Në një intervistë të vitit 2024, ajo komentoi rrjedhjen e këngës “Fantasize”, duke deklaruar me ironi se autorët e publikimit “do t’i shihte në burg”, ndërsa i quajti ata “piratë” dhe “mashtrues”. Padia kërkon që përgjegjësit të identifikohen dhe të mbahen përgjegjës për dëmet e shkaktuara.
