Artan Pogoni, ish-kampion si lojtar dhe trajner i volejbollit dhe i angazhuar prej vitesh në politikë, ka ndërruar jetë tragjikisht. Top Channel njofton se ai ishte duke pushuar në një plazh kur pësoi probleme shëndetësore të zemrës dhe ndërroi jetë pak orë më parë në Vlorë si pasojë e një infarkti.
Sporti dhe akademia shqiptare janë tronditur nga ky lajm. Pogoni ishte Profesor Asistent Doktor, me titull Doktor Shkencash dhe me katër diploma universitare. Ai mbante detyrën e Shefit të Departamentit të Edukimit Fizik dhe Sportit në Fakultetin e Shkencave Sociale, Turizmit dhe Sportit të Universitetit “Barleti” dhe ishte anëtar i Senatit Akademik të këtij universiteti. Karriera e tij ishte ndërtuar mes auditorëve universitarë, fushave sportive dhe institucioneve drejtuese, me fokus në zhvillimin e shkencave të sportit, veçanërisht në rekreacionin sportiv, metodologjinë e stërvitjes dhe edukimin fizik.
Si autor kishte 12 publikime shkencore dhe dy tekste universitare. Ai kontribuoi në projekte ndërkombëtare akademike përmes programeve Tempus dhe Erasmus+, duke promovuar shkëmbimin e eksperiencave dhe modernizimin e sportit shqiptar. Përtej aktivitetit akademik, Pogoni shërbeu si drejtor sporti në Bashkinë e Tiranës. Në vitet e fundit ishte një nga figurat drejtuese të Barleti Volej, ku kontribuoi edhe si trajner i ekipit të femrave.
Emri i tij shfaqej shpesh në debatet publike për problematikat e sportit shqiptar, ku ngrinte shqetësime mbi organizimin dhe funksionimin e federatave sportive. Me ndarjen nga jeta, kolegë, studentë dhe sportistë kanë shprehur dhimbje, duke e cilësuar si humbje për pedagogjinë, studimet dhe zhvillimin e brezave të rinj. Artan Pogoni do të kujtohet si një nga zërat e lidhjes mes shkencës dhe sportit në Shqipëri.
