Një tërmet i fuqishëm me magnitudë 7.1 goditi të martën prefekturën Kumamoto në ishullin jugor Kyushu të Japonisë, duke shkaktuar dëme të shumta, ndërprerje të transportit dhe panik mes banorëve. Autoritetet japoneze raportuan mbi 100 të plagosur, ndërsa mediat vendase njoftuan se 20 deri në 30 persona rezultojnë të zhdukur pas shembjes së pjesshme të qendrës tregtare “Aeon”. Ekipet e shpëtimit kanë nxjerrë deri tani katër persona të gjallë nga rrënojat dhe operacionet e kërkimit vazhdojnë.
Kryeministrja Sanae Takaichi njoftoi ngritjen e një task-force emergjente dhe dërgimin e 3.600 ushtarëve në zonën e prekur. “Prioriteti ynë është shpëtimi i jetëve njerëzore”, deklaroi ajo, duke konfirmuar se janë raportuar ndërtesa të shembura, rrugë dhe ura të dëmtuara, ndërprerje të energjisë elektrike dhe vatra zjarri në disa zona.
Tërmeti shkaktoi probleme të mëdha në infrastrukturë dhe transport: aeroporti i Kumamotos pezulloi operacionet, një tren mallrash doli nga shinat, dhe disa autostrada e linja hekurudhore u mbyllën. Rreth 48 mijë banesa mbetën pa energji elektrike, ndërsa zjarre u raportuan në disa vende. Agjencia Meteorologjike e Japonisë i lëshoi fillimisht një paralajmërim për cunami, i cili më vonë u anulua, por kërkoi që qytetarët të qëndrojnë vigjilentë për shkak të rrezikut të lëkundjeve të tjera të forta në ditët në vijim.
Sipas mediave ndërkombëtare, rreth 300 mijë banorë u këshilluan të evakuojnë si masë paraprake. Autoritetet bërthamore të rajonit njoftuan se nuk janë konstatuar probleme në centralet bërthamore. Operacionet e shpëtimit dhe vlerësimi i dëmeve materiale vazhdojnë, ndërsa autoritetet lokale dhe qendrore kanë mobilizuar forcat e emergjencës për të përballuar pasojat e tërmetit.
