Gjykata Federale e Connecticut ka urdhëruar mbylljen e padisë civile që ish-punonjësja e WWE, Janel Grant, kishte ngritur kundër ish-drejtuesit të kompanisë, Vince McMahon, dhe vetë WWE-së. Grant kishte depozituar padinë në janar 2024, duke akuzuar McMahon për trafikim seksual dhe abuzim gjatë kohës kur ai ishte shef ekzekutiv i kompanisë. Sipas raportimeve të mediave amerikane PWInsider dhe Wrestlenomics, gjyqtarja Sarah F. Russell miratoi kërkesën e përbashkët të palëve për mbylljen e çështjes, pasi ato ranë dakord ta transferonin konfliktin në arbitrazh privat.
Padia u rrëzua “me paragjykim”, që do të thotë se Janel Grant nuk mund ta rihapë të njëjtën çështje në gjykatë më vonë. Vendimi i gjykatës u konsiderua kryesisht formal, pasi palët kishin rënë dakord që në mes të qershorit për ta zgjidhur mosmarrëveshjen jashtë procesit gjyqësor publik. Transferimi në arbitrazh nënkupton që shqyrtimi i pretendimeve dhe çdo zgjidhje eventuale do të zhvillohet jashtë gjykatave federale.
Problemet ligjore të Vince McMahon kishin nisur në 2022, pasi bordi drejtues i WWE nisi një hetim pas një raportimi të The Wall Street Journal që pretendonte se ai kishte paguar miliona dollarë në marrëveshje konfidenciale ndaj disa grave, përfshirë edhe Janel Grant, për të mos bërë publike marrëdhëniet me ta. Ky skandal çoi në tërheqjen fillestare të McMahon nga drejtimi i WWE-së; megjithatë ai u rikthye në bordin drejtues në janar 2023. Dorëheqja e tij përfundimtare erdhi në janar 2024, pak ditë pas ngritjes së padisë nga Grant, në kohën kur WWE po bashkohej me UFC për të krijuar TKO Group Holdings.
Mbyllja e kësaj padie nuk i jep fund problemeve ligjore për McMahon. Ai vazhdon të përballet me një proces tjetër në shtetin e Maryland-it, ku ish-punonjës të WWE-së e akuzojnë për abuzim seksual; në atë çështje janë përfshirë edhe bashkëshortja e tij, Linda McMahon, si dhe kompania WWE.
