Lumir Abdixhiku ka thirrur për 30 korrik Kuvendin e Jashtëzakonshëm të Lidhjes Demokratike të Kosovës, ku pritet të përcaktohet fati i tij si drejtues i partisë. Kërkesa për votëbesim u iniciua nga 148 delegatë, pas pakënaqësive me rezultatin e zgjedhjeve të 7 qershorit, kur LDK doli e treta dhe siguroi 18 deputetë në Kuvendin e Kosovës.
Në njoftim thuhet se kryetari i partisë, në ushtrim të kompetencave dhe detyrimeve të përcaktuara me Statutin, ka vendosur thirrjen e Kuvendit të Jashtëzakonshëm për shkak të përfundimit të procedurave statutare të verifikimit të kërkesës së paraqitur nga delegatët. Të enjten, nga ora 18:00, 354 delegatë do të votojnë për të vendosur nëse Abdixhiku do të vazhdojë si kryetar i LDK-së. Sipas statutit të partisë, nëse kryetari aktual shkarkohet, brenda 60 ditësh duhet të thirret një mbledhje e re e kuvendit për të zgjedhur kryetarin e ri.
Epilogu i këtij kuvendi, që mbahet një javë para seancës konstituive të Parlamentit të Kosovës, pritet të ndikojë në zhvillimet për formimin e institucioneve. Në kohën kur nisi nisma për shkarkimin e tij, Abdixhiku po zhvillonte takime me kryetarin e Lëvizjes Vetëvendosje, Albin Kurti; këto takime u pezulluan pas depozitimit të nënshkrimeve për iniciativën e votëbesimit. Pas raundit të parë të bisedimeve, dy liderët ishin pajtuar të vazhdonin diskutimet në drejtim të formimit të institucioneve.
Po ashtu, të hënën nënkryetari i Lëvizjes Vetëvendosje, Glauk Konjufca, deklaroi se partia e tij vlerëson gatishmërinë e LDK-së, nën udhëheqjen e Abdixhikut, për të arritur një marrëveshje që do të zgjidhte çështjen e presidentit. Vendimi i delegatëve në kuvendin e jashtëzakonshëm do të përcaktojë më tej dinamiken e negociatave dhe hapin e ardhshëm në procesin e formimit të institucioneve shtetërore.
