Rozalinda Plaka, e cila humbi prindërit në tragjedinë e ndodhur në Vidhishtë, pritet të merret sërish në pyetje nga prokurorët, pasi dëshmia e saj e parë, e dhënë menjëherë pas përfundimit të pengmarrjes, konsiderohet e paplotë për shkak të gjendjes së rënduar psikologjike. Sipas burimeve pranë familjes Plaka, 25-vjeçarja ka rrëfyer se në momentin e sulmit ishte në gjumë, u zgjua nga krismat e armës dhe pasi doli nga dhoma pa parë babanë të shtrirë në tokë; ish-i fejuari i saj, Refit Nertil Buzi, e kërcënoi me armë, e mori me forcë dhe e futi në automjet, duke e mbajtur peng për rreth katër orë në zonën kodrinore të Kurjanit.
Prokuroria e Fierit vijon hetimet për zbardhjen e plotë të ngjarjes, si dhe për një procedim tjetër penal që rëndonte ndaj 35-vjeçarit për veprën e mashtrimit. Sipas burimeve, prokurori Kristi Jorgji, i cili mori pjesë personalisht në negociatat me Buzin për ta bindur të dorëzohej, ishte njëkohësisht prokurori që po hetonte edhe çështjen e mashtrimit ndaj tij. Burime tregojnë se Buzi zhvillonte aktivitet në tregtinë e perimeve, duke premtuar fermerëve eksportimin e produkteve në tregjet europiane; disa prej fermerëve e kallëzuan penalisht, pasi pretendonin se nuk morën pagesat për mallin e dorëzuar.
Në momentin e ngjarjes, Buzi ishte nën masën e sigurisë “arrest në shtëpi”, i akuzuar për përndjekje ndaj ish-të fejuarës së tij, Rozalinda Plaka. Katër vite më parë, gjatë qëndrimit në Angli, ai kishte deklaruar se ishte marrë peng nga disa bashkatdhetarë të cilët i kishin kërkuar një shumë parash për lirimin.
Burime pranë grupit hetimor thonë se gjatë negociatave, prokurori Jorgji nuk i kishte komunikuar Buzit vdekjen e ish-vjehrrit, por i kishte thënë se ai dhe bashkëshortja ndodheshin të plagosur në spital; megjithatë Buzi ndiqte zhvillimet përmes telefonit celular. Sipas raportimit të gazetarit të Top Channel, Neritan Trifoni, rreth orës 15:00 Buzi ishte pranë dorëzimit, por pasi iu drejtua negociatorëve “Prit, të shoh lajmet” dhe mësoi nga media për vdekjen e ish-vjehërit, refuzoi të dorëzohej. Rreth një orë më vonë ai qëlloi veten me armë, duke i dhënë fund jetës në sy të forcave të policisë që kishin rrethuar zonën.
