Është publikuar dëshmia e Rozalinda Plakës, ish-e fejuarës së Refit Buzit, i cili tre ditë më parë vrau prindërit e saj dhe më pas e mori peng për disa orë, para se t’i jepte fund jetës. Në rrëfimin e siguruar nga gazetarja e Top Channel, Anila Hoxha, Rozalinda përshkruan fillimet e lidhjes, arsyet e ndarjes dhe momentet e tmerrshme të ngjarjes.
Ajo thotë se lidhja kishte nisur disa vite më parë dhe se fejesa u shpall në vitin 2020, duke krijuar “hyrje-dalje familjare”. Marrëdhënia vijoi deri në vitin 2024, kur Rozalinda kërkoi të ndahej, por sipas saj Refiti nuk pranoi. Arsyet për ndarjen, sipas Rozalindës, lidhen me jetën e çrregullt të tij, që nuk i përshtatej asaj; ndër të tjera ajo përmend se ai kishte qenë jashtë shtetit në burg. Ajo thotë se nuk ka dhënë detaje rreth parave, që dyshohet të kenë qenë një nga shkaqet e tragjedisë. Prindërit e saj, shton Rozalinda, kishin qenë në dijeni të problemeve dhe nuk kishin qenë dakord për lidhjen që në fillim.
Për momentin e sulmit në banesë, Rozalinda rrëfen se ishte duke fjetur kur dëgjoi një zhurmë të fortë, që i dukej si krismë arme. Duke dalë në korridor, pa Refiti Buzin me një armë të gjatë në dorë dhe babanë e saj, Kosta Plaka, të shtrirë e të mbuluar me gjak. Ajo tregon se tentoi t’i marrë armën, por situata u përshkallëzua: “Refiti bërtiste: ‘Do t’ju vras të gjithëve’. Më shtyu dhe më qëlloi me grusht, theu derën e dhomës sime dhe aty jam plagosur me copa xhami në trup.” Më pas thotë se u mor me forcë dhe u largua me të; momentet kur e nxori nga shtëpia deri sa hipi në makinë nuk i kujtohen për shkak të tronditjes.
Gjatë negociatave me policinë, Rozalinda tregon se Buzi ishte zbathur dhe, kur prokurori e pyeti pse, ai iu përgjigj se i kishte hequr dhe ia kishte dhënë asaj për t’i veshur. Hetimet për ngjarjen vazhdojnë, ndërsa autoritetet përpiqen të zbardhin rrethanat dhe motivet që çuan në tragjedinë me tre viktima.
