Një rrjedhje e dyshuar e të dhënave ka ngritur shqetësime në Hollywood, pasi eksperti i sigurisë kibernetike Jeremiah Fowler deklaron se informacionet personale të disa emrave të njohur të industrisë së filmit kanë qenë të aksesueshme publikisht. Sipas Fowler, të dhënat e ekspozuara përfshinin numra telefoni, adresa private email dhe informacione të tjera kontakti që i ekspozojnë personazhet ndaj mashtrimeve kibernetike dhe sulmeve me programe keqdashëse.
Fowler thotë se zbuloi 666.369 regjistrime të lidhura me Festivalin e Filmit Tribeca në Nju Jork, ngjarje e themeluar në vitin 2002 nga Robert De Niro. Mes emrave që pretendohet të ishin të përfshirë janë Angelina Jolie dhe Robert De Niro, si dhe emra të tjerë të njohur si regjisori Danny Boyle dhe regjisorët George Lucas dhe Martin Scorsese, e aktorë të tillë si Neil Patrick Harris, Michael Douglas, Rami Malek dhe Sharon Stone. Eksperti nga kompania amerikane Black Hills Information Security e përshkroi zbulimin si rastin më të madh të të dhënave të personazheve të famshëm që ka parë në karrierën e tij.
Sipas Fowler, rrjedhja duket se ka ndodhur për shkak të një gabimi njerëzor. Ai identifikoi tri databaza të lidhura me Festivalin Tribeca, shumica përmbanin njoftime për media dhe materiale marketingu të ruajtura në një platformë cloud për periudhën 2019–2026. Në njërën prej databazave u gjet një kopje rezervë që përmbante një dosje të quajtur “contacts”, ku ruheshin të dhëna personale të individëve. Fowler thotë se kontaktoi organizatorët e festivalit disa ditë para nisjes së edicionit të këtij viti dhe, pas njoftimit të tij, databaza u hoq nga qasja publike.
Ai gjithashtu kujtoi një ekspozim tjetër më herët gjatë vitit, që sipas tij lidhej me përdorimin e një programi përgjues (stalkerware). Në atë rast databaza përmbante 86.859 imazhe, të cilat dukeshin si pamje ekrani nga pajisja e viktimës, dhe përfshinin komunikime me partnerë biznesi, modele, influencerë, figura publike dhe biseda e fotografi private që nuk ishin menduar të bëheshin publike. Deri më tani, Festivali i Filmit Tribeca nuk ka dhënë një reagim zyrtar lidhur me pretendimet për këtë rrjedhje.
