“Ai ishte një djalë që kishte bërë shumë gola”, thonë disa shqiptarë në Londër që e njihnin Nertil Buzin. Në zhargonin e grupeve kriminale, “bërja gol” nënkupton moskorrektësi në shitblerjen e drogës ose grabitje të shtëpive të barit. Gazetari i Top Channel, Muhamed Veliu, rrëfen dinamikën e pengmarrjes së Buzi, ngjarje e ndodhur katër vjet më parë, ndërsa së fundmi ai i dha fund jetës pas incidentit kur mori peng ish-të fejuarën dhe vrau dy prindërit.
Ngjarja nisi në fund të shtatorit 2022, kur një grup kriminal që vepronte në Manchester erdhi në Londër dhe bindën Buzi të takoheshin në një hotel në Lindje të Londrës. Pa e ditur, ai ra në një kurth; u lidh me zinxhir te radiatorët dhe iu vunë ngjitëse në gojë. Pengmarrësit kërkonin 400.000 stërlina, por zbuluan që Buzi nuk i dispononte në Angli dhe se paratë ishin dërguar në Shqipëri. Ata e telefonuan me video vëllain e tij dhe i treguan Nertilin të lidhur e të rrahur, duke kërcënuar se do ta vrisnin nëse familja nuk paguante. më vonë e torturuan, përfshirë shkuljen e thonjve me pincë.
Vëllai raportoi telefonatat në Drejtorinë Vendore të Policisë së Fierit; ajo ia dërgoi çështjen Drejtorisë për Marrëdhëniet me Jashtë. Pëllumb Seferi inicionoi një operacion të përbashkët me partnerët britanikë, në të cilin u përfshi edhe Neritan Nallbati. Met Police dhe NCA angazhuan një skuadër elitarë; përmes sinjalit të telefonit dhe vëzhgimit u lokalizua hoteli. Dy agjente femra rezervuan një dhomë, fotografuan persona që hynin e dilnin, dhe përmes analizës së fotove dhe përgjimeve identifikuan pjesëtarë të grupit dhe numra telefonash. Nga CCTV i hotelit u zbulua dhoma ku mbahej pengu dhe u hartua plani i shpëtimit; u vendos ndërhyrja me skuadër të armatosur natën.
Gjatë ndërhyrjes u hodh një granatë me gaz dhe u neutralizuan tre persona; Buzi, i torturuar, u dërgua në spital. Met Police njoftoi arrestime për rrëmbim personi, burgosje të rreme dhe kërcënim për të vrarë. Të akuzuarit përfshinin Nelid Arapin (i njohur si “Kid Vlonjati”) dhe pesë të tjerë, me akuza të ndryshme; më 15 prill 2024 Arapi u dënua me 16 muaj për posedim kanabisi me qëllim shitjeje. Pas përmirësimit, Buzi bashkëpunoi me policinë dhe u mbajt në një “safe house” si dëshmitar kyç. Prokuroria më pas hoqi akuzat ndaj pesë të arrestuarve; dy hipoteza për ndërrimin e kursit janë tërheqja e mundshme e dëshmisë së Buzit ose njohja e strategjisë mbrojtëse që do ta diskreditonte atë. Operacioni la si ngushëllim vetëm lirimin e pengut gjallë.
