Komiteti i Trashëgimisë Botërore të UNESCO-s zhvilloi javën e kaluar sesionin e 48-të në Busan, Kore e Jugut, si forumi më i rëndësishëm global për mbrojtjen dhe menaxhimin e trashëgimisë botërore. Mbi 3,000 delegatë dhe ekspertë nga 196 Shtete Palë të Konventës u mblodhën për të diskutuar politikat dhe masat për ruajtjen e pasurive kulturore dhe natyrore me Vlerë Universale të Jashtëzakonshme.
Gjatë sesionit, Komiteti miratoi zgjerimin e zonave të sheshta të baticës dhe zbaticës në Kore, duke përfshirë katër rajone bregdetare kyçe, me qëllim forcimin e mbrojtjes së shpendëve shtegtarë dhe të jetës detare të rrezikuar. Me procedurë emergjente, u vendos gjithashtu të shtohen në Listën e Trashëgimisë Botërore në Rrezik siti arkeologjik i Sebastisë në pjesën veriore të Bregut Perëndimor dhe pesë fortesa në rajonin Jabal Amel të Libanit jugor. Vendimi u argumentua me ndikimin e konflikteve të vazhdueshme në Lindjen e Mesme.
Vendimi për Sebastinë dhe fortestat shkaktoi reagime të kundërta: pala palestineze e vlerësoi si një arritje kombëtare, ndërsa pala izraelite kundërshtoi ashpër, duke e cilësuar atë si përdorim politik të procesit të trashëgimisë kulturore dhe përpjekje për instrumentalizim diplomatik të UNESCO-s.
Delegacioni shqiptar mori pjesë në punimet e Komitetit dhe prezantoi dokumente të reja teknike dhe strategjike për Parkun e Butrintit, si dhe masa për përforcimin e bashkëpunimit me komunitetin lokal, sipas zv.ministres Lira Pipa. Ajo theksoi se vlerësim mori edhe puna për Qendrat Historike të Beratit dhe Gjirokastrës, ku u njoh progresi në avancimin e Planit të Integruar të Menaxhimit, forcimin e koordinimit institucional dhe ndërmarrjen e masave për ruajtjen afatgjatë të këtyre pasurive.
Shqipëria prezantoi gjithashtu masa për mbrojtjen e Liqenit të Ohrit, duke përfshirë shpalljen e Gadishullit të Linit si Ansambël Arkitektonik Urban. Pjesëmarrja në sesion u cilësua si një mundësi për të forcuar bashkëpunimin ndërkombëtar dhe për të avancuar mbrojtjen e trashëgimisë kulturore dhe natyrore të vendit.
