Policia e Tiranës ka finalizuar operacionin e koduar “Skema” dhe ka arrestuar një 37-vjeçar, pronar i një servisi automjetesh në zonën e Astirit, i dyshuar për mashtrim. Operacioni u zhvillua nga Komisariati Nr. 6 pas kallëzimeve nga qytetarë që deklaruan se kishin paguar për riparime automjetesh, por shërbimi nuk ishte kryer.
Nga hetimet e kryera, policia dokumentoi gjashtë raste të dyshuara të veprimtarisë kriminale, ku shqiptari me inicialet M. H., 37 vjeç, dyshohet se mori pagesa për riparimin e automjeteve pa realizuar punimet e premtuara. Në disa prej këtyre rasteve, hetimet dyshojnë se i njëjti ka tentuar gjithashtu të shesë automjetet që ishte ngarkuar t’i riparonte dhe që ishin lënë nga pronarët në ambientet e servisit.
Si pjesë e veprimeve procedurale dhe hetimore, nga ambientet e subjektit u sekuestruan pesë automjete, të cilat ishin lënë në ruajtje nga pronarët e tyre. Sekuestrimi i mjeteve u krye gjatë veprimeve të Policisë së Komisariatit Nr. 6, si rezultat i hetimeve të nisura menjëherë pas kallëzimeve të disa qytetarëve.
Materialet procedurale dhe hetimore, përfshirë dokumentimin e rasteve të konstatuara, i janë referuar Prokurorisë së Rrethit Gjyqësor Tiranë për veprime të mëtejshme. Policia njofton se vijon puna për dokumentimin e rasteve të tjera që mund t’i atribuohen të dyshuarit M. H., me qëllim sqarimin dhe zbardhjen e gjithë veprimtarisë së dyshuar penale në këtë fushë.
Lënda u trajtua nga specialistët për Hetimin e Krimeve të Komisariatit të Policisë Nr. 6, të cilët ndërmorën veprimet hetimore pas marrjes së kallëzimeve nga persona të prekur nga moskryerja e riparimeve, pavarësisht pagesave të kryera.
