Seanca parlamentare e sotme u mbyll me tensione dhe përplasje: deputetët demokratë ngritën zërin, bllokuan foltoren dhe shkaktuan zhurmë duke rrahur tavolina me shuplaka dhe me bidonë plastikë. Kjo formë revoltë ishte kundërshtim për kalimin në votim direkt me propozim të PS, për të cilin demokratët nuk po liroheshin nga foltorja. Mes zhurmës, mazhoranca vazhdoi dhe miratoi projektaktet një nga një. Gjatë seancës u zgjodh edhe kreu i ri i KPP, Ismail Shehu.
U miratuan këto projektrezoluta për vlerësimin e veprimtarisë për vitin 2025, me votime si më poshtë:
– Këshilli i Lartë Gjyqësor: 84 pro, 1 abstenim, 2 kundër.
– Këshilli i Lartë i Prokurorisë: 83 pro, 1 abstenim, 3 kundër.
– Kontrolli i Lartë i Shtetit: 82 pro, 1 abstenim, 0 kundër.
– Prokuroria e Përgjithshme: 83 pro, 1 abstenim, 3 kundër.
– Struktura e Posaçme kundër Korrupsionit dhe Krimit të Organizuar: 83 pro, 1 abstenim, 1 kundër.
– Avokati i Popullit: 83 pro, 0 abstenim, 0 kundër.
– Inspektori i Lartë i Drejtësisë: 81 pro, 1 abstenim, 3 kundër.
U miratuan gjithashtu aktet normative dhe projektligjet e renditura më poshtë:
– Akt normativ nr. 2, datë 30.6.2026 (ndryshime në ligjin nr. 87/2025 për buxhetin e vitit 2026): 82 pro, 0 abstenim, 3 kundër.
– Akt normativ nr. 3, datë 6.7.2026 (financim pjesor për aktivitet kulturor-turistik ndërkombëtar): 80 pro, 0 abstenim, 6 kundër.
– Projektligji “Për grupimet ekonomike me interes evropian”: 82 pro, 0 abstenim, 5 kundër.
– Projektligji “Për shoqëritë evropiane të bashkëpunimit (SHEB)”: 83 pro, 0 abstenim, 1 kundër.
– Projektligji “Për statutin e shoqërive evropiane (SE)”: 83 pro, 0 abstenim, 4 kundër.
– Projektligji “Për mbylljen e shoqërive tregtare me kapital shtetëror në likuidim”: 79 pro, 0 abstenim, 3 kundër.
– Projektligji “Për kërkesat e transparencës për emetuesit e titujve”: 83 pro, 0 abstenim, 3 kundër.
Rendi i ditës përfshinte miratimin e procesverbaleve të seancave të datave 16.7.2026 dhe 23.7.2026, njoftime, serinë e projektrezolutave për vlerësimin e institucioneve të vitit 2025, interpelanca dhe seanca pyetje–përgjigje me Ministrin e Infrastrukturës dhe Energjisë, z. Enea Karakaçi (të kërkuara nga deputetët Blendi Himçi, Bujar Leskaj dhe Erald Kapri), si dhe një listë të gjatë projektligjesh dhe projektvendimesh të tjera, përfshirë ndryshime ligjore të lidhura me buxhetin, turizmin, kodin detar, avokaturën e shtetit, Agjencinë për Mbështetjen e Shoqërisë Civile, kontabilitetin dhe disiplinën në Forcat e Armatosura, si dhe emërime në Komisionin e Prokurimit Publik. Top Channel.
