Komisioni Europian ka përshkallëzuar përplasjen me Meta-n, duke njoftuar se kompania shkel Aktin e Shërbimeve Dixhitale. Brukseli akuzon se rrjetet sociale Facebook dhe Instagram janë projektuar me mekanizma që nxisin përdorimin e tepërt dhe krijojnë varësi te përdoruesit, me një shqetësim të veçantë për fëmijët dhe adoleshentët.
Në qendër të hetimit qëndrojnë elemente të dizajnit dhe funksionalitete specifike të platformave, si lëvizja e pafund e përmbajtjes (infinite scroll), riprodhimi automatik i videove (autoplay), njoftimet push dhe algoritmet e rekomandimit. Sipas Komisionit, këto funksione i shtyjnë përdoruesit të qëndrojnë më gjatë në platforma dhe rrisin rrezikun e përdorimit kompulsiv, veçanërisht te të miturit.
Brukseli i ka kërkuar Meta-s të ndërmarrë ndryshime të rëndësishme në dizajnin e këtyre funksioneve, duke kufizuar ose hequr elemente si infinite scroll dhe autoplay, si dhe duke vendosur mekanizma më efektivë për ndërprerjen e kohës së përdorimit. Komisioni vlerëson se masat aktuale të ndërmarra nga Meta nuk janë të mjaftueshme për të reduktuar varësinë nga rrjetet sociale dhe për të mposhtur rreziqet për grupet më të ndjeshme.
Meta ka kundërshtuar gjetjet paraprake të Komisionit, duke theksuar se ka investuar në mjetet për mbrojtjen e të rinjve, për kontrolle prindërore dhe për kufizime të kohës së përdorimit. Kompania pati mundësinë dhe ka të drejtë të paraqesë mbrojtjen e saj ndaj akuzave.
Nëse shkeljet e konstatuara nga Komisioni konfirmohen, Meta rrezikon një gjobë deri në 6% të të ardhurave globale vjetore, një shifër që mund të arrijë mbi 12 miliardë dollarë. Hetimi i Brukselit dhe kërkesa për ndryshime në funksionalitetet kryesore të Facebook dhe Instagram shënojnë një përplasje të theksuar mes autoriteteve europiane rregullatore dhe kompanisë teknologjike mbi mënyrën se si dizenjohen dhe përdoren shërbimet dixhitale.
