Detaje të reja nga dosja hetimore lidhen me vdekjen e themeluesit të Mango, Isak Antic, i cili humbi jetën më 14 dhjetor 2024 gjatë një ecjeje në malin Montserrat pranë Barcelonës. Një përkthyese britanike, e cila bashkëpunonte herë pas here me terapisten e familjes, ka deklaruar para autoriteteve se ecja ishte pjesë e një procesi terapeutik të udhëzuar nga terapistja Julia Lunderwald, me qëllim që babai dhe djali të përballeshin me një situatë ekstreme.
Sipas dëshmisë, përkthyesja ishte ajo që kërkoi itinerarin malor për takimin midis Isak dhe djalit të tij, duke propozuar rrugën Camí de les Feixades. Ajo tha se një javë para aksidentit kishte shoqëruar Jonathan Antic në këtë itinerar, në mënyrë që ai të njihte terrenin përpara se të rikthehej aty së bashku me të atin. Hetuesit kishin konstatuar më parë, përmes sistemeve të njohjes së targave dhe të dhënave të gjeolokacionit, se Jonathan Antic kishte vizituar të njëjtën zonë të paktën dy herë në ditët që paraprinë vdekjen e babait të tij.
Dëshmitarja shpjegoi se terapistja kishte udhëzuar babanë dhe djalin të përjetonin një situatë me presion të lartë emocional si pjesë e terapisë, dhe se Jonathan duhej të qëndronte “në buzë të një shkëmbi” për të krijuar një përvojë ekstreme. Ajo tha se vendosi të fliste me autoritetet nga frika se prania e saj në zonë disa ditë para ngjarjes mund të interpretohej si e dyshimtë, dhe pasi mësuar se hetimi gjyqësor po shqyrtonte përfshirjen e mundshme të personave të tjerë në ngjarje.
Si pjesë e deklaratës së saj, përkthyesja dorëzoi hetuesve mesazhe dhe skedarë audio të shkëmbyer me terapisten Julia Lunderwald që lidhen me organizimin e ecjes në mal. Këto materiale janë përfshirë tashmë në dosjen e hetimit. Gazeta El Pais raporton se dëshmia konsiderohet se rëndon pozitën e Jonathan Antic, i cili aktualisht është nën hetim për vdekjen e të atit.
