Shërbimi Kombëtar Meteorologjik i Greqisë ka lëshuar një buletin emergjence dhe një paralajmërim portokalli për valën intensive të të nxehtit që pritet të godasë vendin të mërkurën, 22 korrik. Parashikimet tregojnë se temperaturat mund të arrijnë lokalisht deri në 43°C, ndërsa autoritetet paralajmërojnë për rrezik ekstrem të zjarreve. Temperatura më të larta priten në Thesali (41–42°C, me pika deri në 43°C), Greqinë Qendrore Lindore (41–42°C), Atikë (40–41°C) dhe Peloponezin Lindor (41–42°C). Buletini i emergjencës do të përditësohet të mërkurën në mëngjes sipas të dhënave të fundit të parashikimit.
Ministri i Krizave Klimatike dhe Mbrojtjes Civile, Evangelos Tournas, paralajmëroi se kushtet atmosferike të së mërkurës janë të ngjashme me ato gjatë tragjedisë së zjarrit në Mati, duke i cilësuar ndër më të rrezikshmet e kësaj vere. Ai vuri në dukje se kombinimi i temperaturave shumë të larta, thatësirës së zgjatur dhe erërave të forta perëndimore e veriperëndimore krijon kushte që favorizojnë përhapjen e menjëhershme të çdo vatre zjarri dhe e vështirëson ndërhyrjen në fazat e para.
Pas mbledhjes së jashtëzakonshme të Komitetit të Vlerësimit të Rrezikut dhe Trupit Koordinues të Mbrojtjes Civile u vendos që i gjithë mekanizmi shtetëror të vihet në gatishmëri maksimale. Sipas Hartës së Parashikimit të Rrezikut nga Zjarret, zona të mëdha të Greqisë, përfshirë Maqedoninë Qendrore, Thesalinë, Sterean Qendrore, Evian, Peloponezin verior, lindor e jugor dhe Rodosin, do të jenë në nivelin 4 të rrezikut (shumë i lartë). Fthiotida, Lamia, Almirosi, Sterea Lindore, Atika, Argolida dhe Korinthi do të jenë në nivelin maksimal të alarmit, kategoria 5.
Autoritetet u bënë thirrje qytetarëve të tregojnë kujdes maksimal, të shmangin çdo aktivitet që mund të shkaktojë zjarr dhe të respektojnë udhëzimet e Mbrojtjes Civile, pasi kushtet e motit pritet ta bëjnë çdo incident jashtëzakonisht të rrezikshëm. Vala e të nxehtit ka nisur të japë efektet: më 21 korrik, temperatura më e lartë u regjistrua në Oleni të Ilias me 41.4°C; sipas Observatorit Kombëtar të Athinës (meteo.gr), temperatura tejkaloi 40°C në 17 stacione dhe mbi 37°C në 157 stacione meteorologjike.
