Top Channel ka siguruar për herë të parë pamjet nga brenda Postës Shqiptare në Durrës, ku abuzimi me fondet çoi në arrestimin e ish-drejtoreshës së filialit, Elisabeta Mataj, dhe la në arrest shtëpie ish-shefen e financave, Valbona Duni, dhe ish-arkëtaren Paola Dana. Në pamjet e siguruara duket momenti kur Valbona Duni hyn në arkën e filialit, merr një shumë parash dhe i vendos në një thes. Të tjera pamje tregojnë Dunin me letra në dorë, duke biseduar me Paola Danën.
Marrja e masës “arrest në shtëpi” ndaj Valbona Dunit ka hapur një tjetër front hetimor. Dy ditë pas vendimit të gjykatës, bashkëshorti i ish-drejtoreshës Elisabeta Mataj, Feta Mataj, depozitoi një kallëzim penal në Drejtorinë Vendore të Policisë Durrës, duke ngritur akuza ndaj Valbona Dunit. Mataj, Duni dhe P. Dana akuzohen nga prokuroria, pas kallëzimit të Postës Shqiptare, për vjedhje duke shpërdoruar detyrën në bashkëpunim.
Në kallëzimin e bërë më 20 korrik, Feta Mataj pretendon se bashkëshortja e tij është bërë përgjegjëse pa të drejtë për skandalin financiar dhe kërkon që të hetohet edhe Valbona Duni. Ai thotë se verifikimet e kryera në mënyrë private i kanë krijuar dyshime se ish-shefja e financës ka krijuar një pasuri të konsiderueshme, të pajustifikuar me të ardhurat e saj—një rrogë mujore 60 mijë lekëshe. Kallëzuesi kërkon hetim të burimit të pasurisë dhe të aktivitetit ekonomik të familjarëve të Dunit.
Sipas kallëzimit, Duni dhe dy fëmijët e saj disponojnë automjete luksoze të prodhimit të viteve të fundit, me vlerë qindra mijëra euro, disa apartamente në Durrës e Tiranë, si dhe biznese të hapura kohët e fundit. Kallëzuesi shpreh dyshime se këto biznese mund të jenë përdorur për të justifikuar të ardhura të paligjshme, duke ngritur dyshime për pastrim parash. Ai përmend se pasuria e familjes Duni është shtuar ndjeshëm pas vitit 2020, periudhë që përkon me administrimin e fondeve të rindërtimit pas tërmetit nga Posta, dhe kërkon verifikim të këtyre rrethanave.
Në kallëzim kërkohet që organet hetimore të shqyrtojnë bashkëpunimin në administrimin e fondeve publike nga viti 2020 e në vazhdim dhe të kryhet një hetim i plotë pasuror dhe financiar për Valbona Dunin dhe familjarët e saj. Feta Mataj deklaron se bashkëshortja e tij kishte raportuar më parë problematika në sektorin e financës që, sipas tij, nuk ishin marrë parasysh nga drejtuesit. Policia e Durrësit njofton se kallëzimi do t’i kalojë Prokurorisë, e cila do të vlerësojë pretendimet dhe do të vendosë nëse do të regjistrojë procedim penal dhe nisë verifikimet.
