Strukturat e Policisë së Kukësit finalizuan brenda 24 orëve dy operacione kundër veprimtarisë kriminale në fushën e narkotikëve dhe për kapjen e shtetasve të shpallur në kërkim. Operacioni i koduar “Kalimashi” çoi në arrestimin në flagrancë të shtetasit F. L., 34 vjeç, banues në Kukës, i kapur duke u kujdesur për 60 bimët e dyshuara Cannabis Sativa që i kishte kultivuar në territorin e fshatit Kalimash. Një pjesë e bimëve u sekuestrua si provë materiale, ndërsa pjesa tjetër u asgjësua përmes djegies.
Në kuadër të operacionit të koduar “Zabeli”, zhvilluar më datë 11.07.2026, specialistët e Seksionit për Hetimin e Narkotikëve dhe Trafiqeve, në bashkëpunim me specialistët e Sektorit Operacional, shërbimet e Forcës së Posaçme “Shqiponja” dhe Komisariatin e Policisë Kukës, lokalizuan, kapën dhe ndaluan shtetasin e shpallur në kërkim F. R., 63 vjeç, banues në fshatin Gështenjë. Gjykata i kishte caktuar masën e sigurisë “Arrest në burg” për veprat penale “Prodhimi dhe shitja e narkotikëve” dhe “Kultivimi i bimëve narkotike”. Sipas njoftimit, ai dyshohet se, në bashkëpunim me djalin e tij, shtetasin M. R., ka kultivuar 215 bimë narkotike në territorin e fshatit ku banonin.
Gjatë kontrollit në banesën e tyre, Policia gjeti 3 kg lëndë të dyshuar narkotike Cannabis Sativa. Për rastin u proceduan penalisht bashkëshortja e të ndaluarit dhe kryetari i fshatit Gështenjë. Vijon puna për kapjen e shtetasit M. R.
Materialet procedurale lidhur me të dy operacionet u referuan Prokurorisë pranë Gjykatës së Shkallës së Parë të Juridiksionit të Përgjithshëm Kukës për veprime të mëtejshme. Operacionet u zhvilluan me qëllim goditjen e veprimtarive kriminale në fushën e narkotikëve, si dhe për identifikimin dhe nxjerrjen para përgjegjësisë penale të autorëve të tyre.
