SHBA-ja ka zhvilluar natën e dhjetë radhazi sulme ndaj objektivave në Iran, ndërsa Uashingtoni thotë se fushata ushtarake do të vijojë paralelisht me përpjekjet diplomatike me Teheranin. Forcat amerikane goditën instalime raketore dhe dronësh, si dhe infrastrukturë të tjera ushtarake; Shtëpia e Bardhë njofton se operacionet do të vazhdojnë derisa presidenti Donald Trump të vendosë ndryshe.
Trump ka paraqitur operacionin si një përgjigje ndaj veprimeve të Iranit dhe ka paralajmëruar se çdo sulm ndaj anijeve tregtare në Ngushticën e Hormuzit do të marrë një kundërpërgjigje shumë më të ashpër. Ai gjithashtu është zotuar të hakmerret për vdekjen e tre ushtarëve amerikanë gjatë fundjavës. Administrata amerikane argumenton se zgjerimi i operacioneve është i nevojshëm, pavarësisht premtimeve të mëparshme për të shmangur përfshirjen e SHBA-së në konflikte të gjata ushtarake. Zyrtarët amerikanë thonë se shqetësimet për rritjen e çmimeve të naftës dhe ndikimin në zgjedhjet e mesit të mandatit nuk janë përparësia kryesore në këtë fazë.
Gjatë natës së dhjetë janë raportuar shpërthime në disa zona strategjike iraniane, veçanërisht në qytete bregdetare dhe ishuj pranë Ngushticës së Hormuzit. Shpërthime u regjistruan në ishullin Qeshm, si dhe në portet e Bandar Abbas dhe Bandar Lengeh. Sulme janë raportuar gjithashtu në Sirik, një zonë me rëndësi strategjike për shkak të pozicionit pranë rrugëve kryesore detare, dhe në qytetet Konarak e Chabahar në provincën Sistan-Baluchistan, si dhe në Shiraz. Në qytetin Bushehr, ku ndodhet një central bërthamor, u aktivizuan sistemet e mbrojtjes ajrore.
Teherani deklaroi se do të kundërpërgjigjet ndaj sulmeve amerikane. Forcat tokësore iraniane thanë se goditën sisteme raketore amerikane HIMARS në kampin Arifjan në Kuvajt, duke e cilësuar këtë si pjesë të sulmeve ndaj bazave dhe aseteve ushtarake amerikane në rajon. Ambasadori i Iranit në Kombet e Bashkuara i dërgoi OKB-së një letër, duke dënuar sulmin e fundit ndaj një centrali bërthamor iranian.
Përshkallëzimi i konfliktit ka rritur shqetësimet ndërkombëtare për sigurinë në Gjirin Persik dhe për ndikimin e mundshëm në tregjet globale të energjisë.
