Tre persona u plagosën pas një atentati me armë zjarri mbrëmjen e së hënës në lagjen “Vullnetari” në Elbasan. Sipas informacionit paraprak të Policisë, rreth orës 20:30 një person ende i paidentifikuar qëlloi me pistoletë në verandën e një lokali në drejtim të tre shtetasve. Të plagosur rezultuan të jenë Bjorgi Hoxha, 19 vjeç; Armand Tomorrica, 32 vjeç; dhe Renaldo Mance, 31 vjeç. Policia njofton se të tre ndodhen jashtë rrezikut për jetën.
Në momentin e ngjarjes brenda lokalit ishte i pranishëm një oficer i Policisë jashtë shërbimit. Sapo dëgjoi të shtënat, ai doli dhe nisi ndjekjen e autorit. Gjatë largimit autori hodhi armën e zjarrit dhe arriti të largohej në thellësi të lagjes.
Forca të shumta të Policisë rrethuan zonën në një perimetër të gjerë dhe po kryejnë kontrolle intensive për lokalizimin dhe kapjen e autorit. Grupi hetimor, nën drejtimin e Prokurorisë, vijon veprimet në vendin e ngjarjes për sqarimin e plotë të rrethanave. Hetuesit po kryejnë edhe sekuestrimin e çdo prove që mund t’i shërbejë hetimit për identifikimin dhe kapjen e autorit.
Informacioni për ngjarjen është paraprak dhe hetimet vazhdojnë për të siguruar prova dhe për të sqaruar motivet dhe rrethanat e atentatit. Policia vazhdon veprimet operative në terren dhe kërkon bashkëpunimin e qytetarëve për çdo informacion që mund të ndihmojë në identifikimin e personit që qëlloi.
