Kryeministri Edi Rama reagoi pas publikimit të raportit ndërkombëtar Environmental Performance Index 2026, duke vënë në dukje se Shqipëria ka bërë progres në mbrojtjen e natyrës, por përballet ende me sfida. Sipas indeksit, Shqipëria është e para në Ballkanin Perëndimor dhe e 46-ta nga 177 vende në botë, me progresin më të madh në rajon gjatë 10 viteve të fundit; për zbutjen e ndryshimeve klimatike renditet e 21-ta në botë. Rama thekson se këto janë vlerësime të institucioneve ndërkombëtare dhe akademike që prej një çerek shekulli masin performancën mjedisore me të njëjtën metodologji.
Ai u shpreh se për javë të tëra ishte krijuar përshtypja se Shqipëria ishte kthyer në “armikun e natyrës së vet”, por sipas tij realiteti tregon ndryshim. Rama përmendi periudhën kur vendi ishte i prerjeve barbare të pyjeve, i gjuetisë së egër që shfaroste specie, i lumenjve të kthyer në vend grumbullimesh mbetjesh dhe i një shteti që shpesh mungonte me mjete, instrumente, kulturë dhe vëmendje për mbrojtjen e natyrës. Sot, tha ai, Shqipëria është ndryshe, dhe fakti që zhvillohen protesta të mëdha për mjedisin pasqyron edhe ndryshimin e shoqërisë shqiptare.
Kryeministri thekson se prania e shumë njerëzve që shqetësohen për flamengot, lagunat, pyjet dhe biodiversitetin është një arritje e shoqërisë dhe “fitore qytetërimi”. Ai shtoi se debati për natyrën është shenjë e përparimit krahasuar me heshtjen ndaj shkatërrimit që kishte vendi para dhjetë vjetësh, dhe se nuk i sheh si armiq ata që kërkojnë mbrojtje të natyrës, edhe kur ka dallime mendimesh.
Rama pranon se qeverisja ka bërë gabime dhe se raporti nuk është një medalje për vetëkënaqje, por një përgjegjësi: duhet të dëgjohet më shumë, të korrigjohet shpejt kur është e nevojshme dhe të mbrohet me vendosmëri ekuilibri mes zhvillimit dhe natyrës. Ai nënvizoi se të ardhmen europiane të Shqipërisë nuk duhet ta ndërtojmë duke zgjedhur mes ekonomisë dhe mjedisit, por duke i bërë të ecin bashkë ekonominë, mjedisin dhe faktet. Raporti e bën të krenuar, por, tha Rama, duhet përulësi dhe vendosmëria për të vijuar përmirësimin; reflektimi i premtuar pas “pasqyrës së bulevardit të flamengove” do të vijë së shpejti.
