Policia e Vlorës zhvilloi brenda 24 orëve tre operacione kundër armëmbajtjes pa leje, vjedhjes me dhunë dhe transportimit të paligjshëm të personave drejt Greqisë, ku u arrestuan tre shtetas dhe u sekuestruan një armë zjarri, një thikë dhe një automjet.
Në operacionin e koduar “Pasagjeri”, shërbimet e Stacionit të Policisë Dhërmi, në bashkëpunim me Forcën e Posaçme “Shqiponja”, arrestuan në flagrancë D. M., 26 vjeç, banues në Babrru, Tiranë. Gjatë kontrollit pas ndalimit të taksisë me të cilën ai udhëtonte, policia i gjeti një pistoletë me krehër dhe fishekë, të cilën e posedonte pa leje.
Operacioni i dytë, i koduar “Thirrja”, u zhvillua nga Komisariati i Policisë Delvinë në bashkëpunim me Komisariatin e Policisë Sarandë dhe Forcën Kombëtare të Sigurisë, Njësia Fier. U arrestua H. Z., 31 vjeç, banues në fshatin Vanë, pak orë pasi një punonjës i OShEE-së kallëzoi se ishte dhunuar dhe se autori i kishte vjedhur automjetin e kompanisë. Mjeti u lokalizua dhe iu kthye subjektit me urdhër të prokurorit. Gjatë kontrollit fizik të të arrestuarit, policia i gjeti edhe një thikë, e cila u sekuestrua.
Ndërhyrja e tretë u finalizua nga shërbimet e Komisariatit të Policisë Kufitare Sarandë në operacionin “Barriera”, ku u arrestua në afërsi të Pikës së Kalimit Kufitar Qafë Botë M. Q., 30 vjeç, banues në Belsh. Ai dyshohet se transportonte me një automjet tip “Volkswagen” pesë shtetas — katër nga Shqipëria dhe një nga Kosova — të cilët synonin të kalonin ilegalisht në Greqi, pasi kishin pengesa për lëvizjen në zonën Schengen.
Materialet procedurale nga të tri operacionet janë referuar në prokuroritë përkatëse për vijimin e veprimeve hetimore.
