Projektligji për ndryshimet në ligjin “Për mbrojtjen e tokës bujqësore” u diskutua në Kuvend, ku u ngritën shqetësime dhe kundërargumente në lidhje me lehtësimin e përdorimit të tokave bujqësore për parqe fotovoltaike dhe eolike. Deputeti socialist Erion Braçe paralajmëroi se projektligji lë hapësirë që kufijtë për zhvillimin e këtyre projekteve të përcaktohen me vendime të Këshillit të Ministrave, duke rrezikuar që të përfshihen sipërfaqe të konsiderueshme tokash bujqësore. Ai kërkoi që kufijtë të përcaktohen qartë brenda vetë ligjit dhe jo të delegohen në kuadrin e vendimeve ekzekutive. Braçe theksoi nevojën për një përkufizim më të qartë në nenin 2, pika 6, që të përcaktojë kufijtë për secilin park dhe të parandalojë zgjerimin e këtyre investimeve në të gjithë tokën bujqësore në vend. Ai shtoi se koncepti mbi tokën bujqësore nuk duhet të ndryshojë: toka duhet të shërbejë për bujqësi, jo për industri, ndërsa vuri në dyshim numrin e lejeve të dhëna deri tani për parqe eolike dhe agro-fotovoltaike, përfshirë ato në toka me bonitet të lartë (9-10), duke nënvizuar se përgjigjja mund t’i përkasë Ministrisë së Energjitikës.
Ministri i Bujqësisë, Andis Salla, mbrojti ndryshimet, duke i cilësuar ato si një ndërhyrje të kufizuar dhe të nevojshme për përshtatjen e ligjit me zhvillimet e bujqësisë moderne. Salla argumentoi se objekti i ligjit mbetet mbrojtja e tokës bujqësore dhe funksioni kryesor i saj si burim prodhimi nuk cënohet. Ai shpjegoi se ndryshimet synojnë vendosjen e disa teknologjive që përmirësojnë përdorimin e ujit dhe të lëndëve ushqyese, rrisin produktivitetin dhe vendosin teknologjinë në funksion të tokës dhe fermerit. Ministri theksoi se disa kritere do të përcaktohen me vendim të Këshillit të Ministrave, por sipas tij, do të zbatohen rregulla strikte. Debate mes Braçes dhe Sallës u përqendruan kryesisht te nevoja për kufizime ligjore më të qarta dhe garantimi që përdorimi i tokës për energji të rinovueshme të mos bëhet në dëm të prodhimit bujqësor.
