Ministrja Elisa Spiropali publikoi dokumentin që kishte përgatitur për Asamblenë Kombëtare të Partisë Socialiste, ku propozon hapjen e një Debati Kombëtar për një “Marrëveshje të Re për Shqipërinë”. Dokumenti, që nuk ishte menduar për publikim, dërgohet si kontribut për debat brenda partisë, por u bë i disponueshëm për publikun për shkak të interesimit të medias. Autoria e paraqet procesin jo si program partie, por si një proces kombëtar për ripërtërijen e marrëdhënies mes shtetit, institucioneve, politikës dhe qytetarëve.
Teksti vë në dukje se Shqipëria ndodhet në një moment vendimtar: institucionet funksionojnë dhe ekonomia rritet, por shoqëria kërkon më shumë përfaqësim, pjesëmarrje, besim te institucionet, drejtësi shoqërore dhe një marrëdhënie më të drejtë ndërmjet qytetarit dhe shtetit. Theksohet nevoja për më shumë demokraci, më shumë konkurrencë, meritokraci dhe kufizim të personalizimit të pushtetit. Sipas dokumentit, energjia qytetare duhet trajtuar si mundësi për vetëkorrigjim dhe përforcim institucional, jo si kërcënim.
Pjesa e dytë paraqet angazhimet që Partia Socialiste duhet t’i marrë ndaj vetes: të bëhet partia më demokratike në Shqipëri; të garantojë zgjedhje të lira, konkurruese dhe periodike në çdo nivel; të rikthejë debatin si kulturë politike; të sigurojë përfaqësim të mendimeve të ndryshme; të promovojë meritokracinë dhe hapësirë për të rinjtë; të forcojë autonominë e organizatave partiake; të promovojë etikën e përgjegjësisë publike; transparencën; vetëreformimin e vazhdueshëm; dhe ndarjen e qartë mes partisë dhe shtetit.
Pjesa e tretë propozon angazhimet kombëtare për dekadën e ardhshme: zgjedhje që prodhojnë besim; demokraci që dëgjon; Parlamentin në qendër të jetës demokratike; drejtësi e pavarur dhe luftë kundër pandëshkueshmërisë, korrupsionit dhe krimit; administratë profesionale; ekonomi konkurruese; arsimi si themel i meritës; shëndetësi me dinjitet; media e lirë; dhe një sistem zgjedhor që rikthen përfaqësimin, propozuar si Sistem Proporcional Kombëtar me lista të hapura dhe procese të brendshme demokratizuese në parti. Dokumenti fton qytetarët, institucionet dhe partitë të bëhen pjesë e procesit, duke nënvizuar se marrëveshja nis me angazhimin për të ndryshuar mënyrën e ushtrimit të pushtetit.
