Ministri i Mbrojtjes i Ukrainës, Mykhailo Fedorov, është shkarkuar pas vetëm gjashtë muajsh në detyrë si pjesë e ndryshimeve të mëdha në qeverinë e drejtuar nga presidenti Volodymyr Zelensky. Fedorov konfirmoi largimin përmes një postimi në rrjetet sociale, duke thënë se kishte qenë “një nder i madh t’i shërbente popullit ukrainas”. Autoritetet nuk kanë dhënë një arsye zyrtare për shkarkimin dhe nuk është bërë e ditur nëse Fedorov do të marrë një tjetër post në qeveri.
Pas largimit të tij, pritet që në krye të Ministrisë së Mbrojtjes të emërohet Ihor Klymenko, aktualisht ministër i Brendshëm i Ukrainës. Vendimi vjen ndërsa Ukraina përgatitet për një tjetër dimër të vështirë lufte dhe për sulme të mundshme ruse ndaj infrastrukturës energjetike.
Fedorov ishte emëruar ministër i Mbrojtjes në janar. Gjatë mandatit të tij Ukraina ka vijuar përdorimin e teknologjisë së dronëve në luftën kundër Rusisë. Më herët, si ministër i Transformimit Digjital, ai u vlerësua për zgjerimin e përdorimit të dronëve ushtarakë dhe për forcimin e bashkëpunimit me kompani të teknologjisë amerikane. Sipas raportimeve, ai kishte krijuar përplasje me figura të rëndësishme politike dhe ushtarake për përpjekjet e tij për të kufizuar favorizimet në kontratat e mbrojtjes.
Ndryshimet në kabinet erdhën pasi Zelensky propozoi si kryeministër të ri Sergii Koretskyi, drejtuesin e kompanisë shtetërore të naftës dhe gazit Naftogaz. Presidenti deklaroi se ndryshimet janë të nevojshme “përgatitjen për dimrin”, dhe se Koretskyi është kandidati më i përshtatshëm për drejtimin e qeverisë në këtë fazë, veçanërisht pas sulmeve të vazhdueshme ruse ndaj rrjetit energjetik ukrainas.
Sulmet ruse ndaj centraleve dhe infrastrukturës energjetike gjatë dimrit të kaluar lanë shumë zona pa energji elektrike dhe ngrohje për periudha të gjata, me temperatura që ranë deri në minus 20 gradë Celsius. Presidenti njoftoi gjithashtu synimin për të nisur prodhimin e raketave për sistemet amerikane Patriot deri në fund të vitit, pas premtimit të SHBA-së për t’i dhënë Kievit licencë; megjithatë, ekspertët thonë se krijimi i një linje të qëndrueshme prodhimi mund të kërkojë disa vite. Kombet e Bashkuara raportuan se muaji qershor shënoi numrin më të lartë të viktimave civile nga sulmet ruse që prej prillit 2022, me të paktën 293 civilë të vrarë.
