Edhe pse disa vende të BE-së kanë përmirësuar sigurinë rrugore, Europa në tërësi nuk po përmbush ritmin e nevojshëm për të arritur objektivin e uljes me 50% të vdekjeve nga aksidentet rrugore deri në vitin 2030, vë në dukje raporti i Këshillit Evropian të Sigurisë së Transportit (ETSC). Gjatë vitit 2025 rreth 19 500 persona humbën jetën në rrugët e Bashkimit Evropian, ndërsa më shumë se 100 mijë të tjerë u plagosën rëndë. Numri i viktimave ra vetëm 2% krahasuar me një vit më parë, dhe që nga viti 2019 ulja ka qenë vetëm 15%. Për të qenë në linjë me synimin e 2030-s, BE-ja duhej të kishte arritur një ulje prej rreth 31% deri tani.
Ekspertët paralajmërojnë se për të arritur objektivin, nga tani deri në vitin 2030 numri i viktimave duhet të ulet me rreth 10% çdo vit, një ritëm rreth pesë herë më i lartë se ai aktual. Megjithatë, raporti evidenton edhe histori suksesi: Polonia ka ulur numrin e viktimave me 43% që nga 2019, Belgjika me 31% dhe Danimarka me 32%. Danimarka vlerësohet për qasjen e saj afatgjatë ndaj sigurisë rrugore, duke kombinuar fushata ndërgjegjësuese, kontrolle më të forta, zgjerimin e përdorimit të kamerave të shpejtësisë, luftën kundër drejtimit nën ndikimin e alkoolit dhe investime në infrastrukturë.
Norvegjia dhe Suedia mbeten me normat më të ulëta të vdekjeve në rrugë, me vetëm 19 viktima për çdo milion banorë, krahasuar me mesataren e BE-së prej 43 viktimash për milion. Në anën tjetër, Holanda paraqitet si një rast shqetësues: është vendi i vetëm europian ku numri i vdekjeve për milion banorë është më i lartë se një dekadë më parë, pavarësisht investimeve në automjete elektrike, zona me emetime zero dhe rrjetin për biçikleta.
Siguria e çiklistëve mbetet problem i veçantë: vdekjet e çiklistëve në BE kanë rënë vetëm rreth 0.5% në vit gjatë dekadës së fundit, ndërsa vdekjet e përdoruesve të tjerë të rrugës janë ulur katër herë më shpejt. Çiklistët përbëjnë rreth 10% të të gjitha viktimave të aksidenteve rrugore, çka kërkon investime të mëdha në infrastrukturë të dedikuar dhe masa mbrojtëse. ETSC nënvizon se objektivi i vitit 2030 mbetet i arritshëm vetëm për vendet që e trajtojnë sigurinë rrugore si prioritet afatgjatë politik dhe zbatojnë masa konkrete për reduktimin e aksidenteve.
