Një transferim që dukej i përfunduar u prish brenda 72 orësh. Anan Khalaili ishte shumë pranë kalimit te Interi, pasi klubi zikaltër arrin marrëveshjen me Union Saint Gilloise për 25 milionë euro plus bonuse dhe kishte përgatitur një kontratë pesëvjeçare për futbollistin. Megjithatë, pas kontrollit mjekësor të kryer të premten, u shfaqën probleme të para që çuan në anulimin e përkohshëm të operacionit.
CONI kërkoi ekzaminime më të detajuara për të vlerësuar gjendjen shëndetësore të Khalailit para se të lejonte finalizimin e transferimit. Pas analizave shtesë, verdikti i institucionit ishte negativ, që do të thotë se nuk u dha pëlqimi për t’i dhënë fund procedurave të transferimit. Si pasojë, Interi duhet të rimendojë skemën e blerjeve dhe të hulumtojë zgjidhje të tjera për të gjetur pasuesin e Denzel Dumfries, pozicionin për të cilin ishte menduar të përdorej Khalaili.
Pas dështimit të transferimit, futbollisti 22-vjeçar thyen heshtjen dhe reagoi përmes një postimi në Instagram Story. Postimi përmbante një foto të tij në gjunjë pas shënimit të një goli dhe një mesazh të shkurtër: “Mundet që të urreni diçka që mund të jetë një e mirë për ju dhe mundet që të doni diçka që në fakt mund të jetë një e keqe për ju.” Ky postim ishte komenti i parë publik i Khalailit pas anulimit të lëvizjes drejt kampionëve të Italisë.
Ndërkohë, situata e tij e ardhshme sportive mbetet e pasigurt. Mbetet e qartë që, për momentin, një kalim në Serie A nuk do të jetë opsion, ndërsa futbollisti do të kthehet në Saint Gilloise në Belgjikë dhe do të presë vendimet e mëtejshme lidhur me karrierën e tij. Ndër klubet e përfshira, Interi do të vazhdojë kërkimin për alternativat e duhura në tregun e transferimeve, pasi marrëveshja e planifikuar për Khalailin nuk mund të finalizohet pas rezultateve negative të kontrolleve mjekësore.
