Pas certifikimit të rezultatit zgjedhor, kreu i Lëvizjes Vetëvendosje, Albin Kurti, zhvilloi takime me kryetarët e Partisë Demokratike të Kosovës dhe të Lidhjes Demokratike të Kosovës. Diskutimet u cilësuan si konstruktive, por Kurti u pajtua vetëm me kryetarin e LDK-së, Lumir Abdixhiku, për të vijuar takimet e mëtejshme.
Njohësit e politikës vlerësojnë se arritja e një marrëveshjeje mes Vetëvendosjes dhe LDK-së është e vështirë për shkak të përçarjeve të brendshme në Lidhjen Demokratike. Eksperti politik Dritëro Arifi theksoi se “Abdixhiku po shkon me një legjitimit të thyer, fragjil, i cili nuk e ka as komandën e plotë mbi deputetët e Lidhjes Demokratike, të cilët kanë shprehur haptas pakënaqësitë, jo vetëm ndaj z. Abdixhikut por edhe me mënyrën se si po dëshiron të arrihet një marrëveshje.” Për pasojë, vazhdimësia e bisedimeve me LDK-në shihet si sfidë për Vetëvendosjen.
Analistët shtojnë se këto takime mund të interpretohen si një përsëritje e zhvillimeve të legjislaturës së kaluar dhe si shfrytëzim i situatës për përfitim elektoral në të ardhmen. Arifi theksoi gjithashtu se “Janë disa inskenime, në radhë të parë jam i bindur që Lëvizja Vetëvendosje do të investojë në masë të madhe që të sforcojë narracionin e saj politik se e bëri të pamundur, por se faji duhet të kërkohet te LDK-ja e cila nuk po arrin të merret vesh për të ndarë pushtetin.”
Nga takimet e së premtes, kreu i Partisë Demokratike të Kosovës, Bedri Hamza, shpalli se PDK do të qëndrojë në opozitë në këtë mandat, duke i mbyllur derën Vetëvendosjes për një bashkëpunim të mundshëm. Ndërkaq, kryeministri në detyrë Albin Kurti njoftoi se do të zhvillojë takime të tjera përpara se të thirret seanca konstituive e Kuvendit, për të cilën afati është deri më 7 gusht.
Lajmi publikohet në Top Channel.
