Një valë e fortë nxehtësie po prek pjesë të mëdha të Evropës, e shkaktuar kryesisht nga rikthimi i anticiklonit afrikan, një masë ajrore e nxehtë që vjen nga Afrika e Veriut dhe sjell temperatura ekstreme. Ky fenomen është bërë më i shpeshtë vitet e fundit dhe ndikon edhe në Ballkan, përfshirë Shqipërinë, ku temperaturat e larta, mungesa e reshjeve dhe ajri i nxehtë afrikan kanë krijuar kushte tipike të valëve të të nxehtit.
Anticikloni afrikan lëviz zakonisht nga jugu drejt veriut, duke transportuar masa ajri shumë të ngrohta nga zona si Maroku drejt Evropës, përshkruan Corriere. Për shkak të drejtimit të tij në sens të akrepave të orës, zonat që ndodhen përgjatë trajektores preken më shumë nga temperaturat ekstreme. Sipas ekspertëve, masa e ajrit nxehet fillimisht Spanjën, më pas përhapet në Italinë qendrore dhe veriore, Francën, Belgjikën dhe Holandën, por ndikimi shtrihet edhe në Mesdhe dhe Ballkan.
Në disa vende efekti i valës së nxehtësisë ndryshon brenda vetë territorit: Italia, për shembull, është ndarë në dy zona, me temperatura shumë të larta në veri, ndërsa jugu ka mbetur më afër mesatareve sezonale. Kjo ndarje shpjegohet me rrugën që ndjek masa e ajrit të nxehtë dhe me faktin se disa zona bien drejtpërdrejt në trajektoren e anticiklonit.
Meteorologët lidhin rritjen e shpeshtësisë dhe kohëzgjatjes së këtyre episodeve me ndryshimet klimatike. Sipas tyre, kombinimi i ajrit të nxehtë afrikan me presionin e lartë atmosferik, rrezatimin e fortë diellor dhe tokën e thatë krijon kushtet ideale për temperatura ekstreme. Edhe pse aktualisht disa zona preken më shumë se të tjerat, ekspertët paralajmërojnë se vendet e jugut të Evropës dhe Ballkanit mbeten të ekspozuara ndaj episodeve të forta të të nxehtit gjatë verës.
