Një 21-vjeçar shqiptar është nën hetim nga Prokuroria e Riminisë për akuzën e dhunës seksuale, pas kallëzimit të bërë nga një turiste gjermane 18-vjeçare që ndodhej me pushime në bregdetin italian gjatë fundjavës së parë të korrikut. Sipas mediave italiane, vajza ishte në Riviera me dy shoqe të saj, të treja me origjinë nga Gjermania dhe njësoj në moshë. Ajo kishte njohur 21-vjeçarin, i cili jeton prej vitesh në Itali por është me origjinë shqiptare, dhe kishin dalë së bashku nga një diskotekë në Rimini mbrëmjen e së dielës, më 5 korrik.
Vajza ka deklaruar se pas disa orësh në lokal, katër të rinjtë u zhvendosën në plazh pasi kishin konsumuar sasi të konsiderueshme alkooli. Sipas denoncimit të saj në polici, ajo dhe i riu u ndanë nga grupi dhe më pas ai dyshohet se e kishte detyruar të kryente marrëdhënie seksuale kundër vullnetit të saj. Ajo ka thënë se kishte tentuar të rezistonte, por sipas saj ai e kishte mposhtur fizikisht dhe kishte përfituar nga gjendja e saj e dehjes. Ditën pas ngjarjes, viktima u paraqit në komisariatin e policisë në Rimini dhe bëri kallëzim.
I riu, përfaqësuar nga avokati Massimiliano Orrù, ka mohuar të gjitha akuzat dhe pretendon se mes tyre ka pasur vetëm puthje dhe se çdo afërsi ka qenë me dëshirë nga të dyja palët. Avokati ka deklaruar: “Klienti im është i bindur për pafajësinë e tij dhe, për të treguar qetësinë e tij, ka dorëzuar pa asnjë hezitim të brendshmet e tij te autoritetet për analizat përkatëse.”
Për shkak të kompleksitetit të çështjes, Prokuroria e Riminisë i ka kërkuar gjyqtarit zhvillimin e një incidente prove për të rindërtuar dinamikën e mbrëmjes dhe për të sqaruar rrethanat e ngjarjes. Ky rast është i dyti i raportuar për dhunë seksuale në zonën e Riminisë brenda pak ditësh; më parë një 23-vjeçare kishte denoncuar se ishte dhunuar gjatë fundjavës së eventit “Notte Rosa”. Hetimet për të dyja rastet vazhdojnë, ndërsa autoritetet po mbledhin prova dhe dëshmi për përcaktimin e saktë të dinamikës së ngjarjeve.
