Italia po përjeton valën e tretë të të nxehtit ekstrem, dhe meteorologët paralajmërojnë se ditët në vijim do të sjellin një rritje të ndjeshme të temperaturave. Në fillim të javës pritet një ulje e lehtë e temperaturave në disa zona, por anticikloni afrikan do të fuqizohet sërish duke rikthyer vapën intensive, me kulmin e parashikuar për të enjten dhe të premten. Temperaturat pritet të jenë të ngjashme me valën e dytë të të nxehtit, që zgjati rreth dy javë. Në ultësirën e Padanisë termometri pritet të shënojë 38–39°C, ndërsa në disa zona të Sardenjës, veçanërisht në veri të Cagliarit, temperatura mund të arrijë 40–42°C. Vala e të nxehtit do të prekë kryesisht rajonet qendrore dhe veriore të Italisë; në Romë parashikohen 37–38°C, ndërsa qytetet e veriut do të përballen me vapë të fortë. Rajonet jugore do të jenë disi më pak të prekura, megjithatë edhe atje temperaturat do të mbeten shumë të larta, duke arritur rreth 38°C në Foggia dhe disa zona të Pulias. Ekspertët shpjegojnë se prej disa vitesh anticikloni afrikan ndjek një trajektore që godet fillimisht Spanjën, më pas Italinë veriore dhe më tej Francën, Belgjikën e Holandën, duke lënë jugun e Italisë relativisht më pak të ekspozuar. Ky ndryshim lidhet me zëvendësimin e anticiklonit të Azoreve nga ai afrikan, i cili vjen nga Afrika e Veriut dhe karakterizohet nga shpërthime më të forta dhe më të gjata të ajrit të nxehtë. Sipas meteorologëve, nuk pritet një ndryshim i rëndësishëm i situatës deri në fund të muajit, dhe temperaturat e larta pritet të mbeten një tipar dominues edhe gjatë gushtit, në përputhje me parashikimet sezonale të bazuara në tendencat e viteve të fundit. Vapa ekstreme do të ndihet edhe në zonat malore; edhe në majën e Mont Blanc, mbi 4.500 metra lartësi, pritet që temperatura të mbetet mbi pikën e ngrirjes, duke konfirmuar se vala e të nxehtit do të përfshijë edhe Alpet.
42°C dhe net tropikale, Italia hyn në ditët më nxehta të verës; zonat do të goditen më fort
