Nëna e njërës prej tre vajzave të dyshuara, 15-vjeçare, për pjesëmarrje në dhunimin e një 17-vjeçareje në Fier, foli para mediave përpara ambienteve të Gjykatës së Fierit, ku pritet seanca për caktimin e masës së sigurisë. Ajo deklaroi se vajza e saj është e shtruar në spitalin psikiatrik dhe po merr trajtim mjekësor, duke ripërsëritur shpjegimet që kishte dhënë më parë përpara kamerave të Top Channel dhe duke kërkuar mirëkuptim për gjendjen e së miturës, si dhe shprehu keqardhje për ngjarjen.
Në fjalën e saj para gazetarëve, nëna tha se nuk di shumë për gjendjen shëndetësore të vajzës dhe se është shumë e shqetësuar. Ajo theksoi se e ka takuar vajzën në spital dy herë dhe e ka parë të duket jo mirë. Nënvizon se nuk di nëse vajza është në dijeni të pamjeve që kanë qarkulluar në rrjetet sociale. Sipas saj, telefoni dhe rrobat që i janë parë vajzës i kanë qenë të blera nga familja.
E pyetur për jetën sociale të së miturës, nëna tha se kur vajza kthehej në orët e para të mëngjesit i thoshte se kishte qenë me shoqe, por nuk tregonte detaje. Ajo shtoi se nuk i njihte shoqet e vajzës as prindërit e tyre dhe se i ka parë për herë të parë në polici. Për familjen e vajzës që u dhunua, nëna tha se nuk e njeh prindin fare.
Nëna pohoi se nuk ka marrë avokat për vajzën dhe se gjatë vitit të fundit është paraqitur disa herë në polici së bashku me bashkëshortin, duke shpjeguar se kur i kanë njoftuar për problemet e vajzës në shkollë, drejtoresha i ka nxjerrë jashtë dhe u ka thënë “Zhduku jashtë”. Ajo kërkoi kurim të plotë për vajzën dhe tha se ka kërkuar nga gjykata që t’i jepet trajtim i nevojshëm. Top Channel.
