Policia e Lezhës arrestoi në flagrancë tre persona pas konstatimit të tre rasteve të kultivimit të bimëve të dyshuara narkotike në zonat e Mirditës dhe Kurbinit. Operacionet u zhvilluan në terren dhe nga ajri, me përdorimin e dronëve, dhe mbi bazën e informacioneve të siguruara në rrugë operative. Në mision u angazhuan Komisariati i Policisë Mirditë, Komisariati i Policisë Kurbin dhe Seksioni për Hetimin e Narkotikëve në Drejtorinë Vendore të Policisë Lezhë, si dhe specialistët për Hetimin e Krimeve të Komisariatit të Policisë Kurbin.
Gjatë veprimeve u sekuestruan dhe u asgjësuan gjithsej 436 bimë të dyshuara narkotike të llojit Cannabis sativa. Në fshatin Sheshaj të Mirditës, uniformat arrestuan në flagrancë shtetasin J. R., 21 vjeç, banues në Durrës, i kapur duke u kujdesur për 222 bimë të dyshuara narkotike Cannabis sativa. Në një rast tjetër, Seksioni për Hetimin e Narkotikëve, në bashkëpunim me specialistët e Hetimit të Krimeve të Komisariatit të Policisë Kurbin, arrestoi shtetasin D. N., 47 vjeç, banues në Fshat Laç, i cili dyshohet se kujdesej për 151 bimë të dyshuara narkotike.
Ndërkohë, specialistët e Komisariatit të Policisë Kurbin arrestuan shtetasen V. M., 44 vjeçe, pasi në lagjen “Rrahu i Pashës” në Laç u gjetën 63 bimë të dyshuara narkotike Cannabis sativa, të cilat dyshohet se kultivoheshin prej saj. Të gjitha bimët e konstatuara u asgjësuan me anë të djegies.
Materialet procedurale nga veprimet e kryera janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme hetimore. Policia raporton se ndërhyrjet bënë përdorim të sistemeve të patrullimit ajror dhe tokësor dhe u bazuan në informacione operative, me qëllim evidentimin, ndërprerjen e veprimtarisë së kultivimit dhe përcjelljen e procedurave ligjore ndaj personave të arrestuar.
