Të paktën 16 persona kanë vdekur nga uria gjatë javëve të fundit në rajonin verilindor të Karamojës në Ugandë, pas një thatësire të zgjatur që ka shkatërruar të mbjellat dhe ka lënë mijëra familje pa ushqim. Qeveria njoftoi se reshjet kanë munguar pothuajse plotësisht që nga muaji prill, periudhë që përkon me sezonin e mbjelljeve, dhe si pasojë sipërfaqe të tëra të mbjella me misër, melek (sorghum) dhe sojë janë tharë, duke shuar shpresat për një korrje të mirë këtë vit.
Kryeministrja Robinah Nabbanja e përshkroi situatën si alarmante dhe njoftoi se qeveria do t’i kërkojë kabinetit miratimin për blerjen e sasive shtesë të ndihmave ushqimore për zonat e prekura. Autoritetet kanë nisur shpërndarjen e ndihmave emergjente për familjet më të rrezikuara.
Ekspertët lidhin krizat e përsëritura ushqimore në Karamoja me ndryshimet klimatike dhe mungesën e reshjeve, por gjithashtu përmendin shpyllëzimin, mbikullotjen dhe dëmtuesit e kulturave bujqësore si faktorë kontribuues. Sipas tyre, nevojiten investime në sisteme vaditëse, në kultura bujqësore rezistente ndaj thatësirës dhe në përmirësimin e parashikimit të kushteve klimatike për të zvogëluar rrezikun e krizave të ardhshme.
Rajoni i Karamojës ka përjetuar më herët kriza të rënda ushqimore. Një raport i një institucioni zyrtar për të drejtat e njeriut citonte se në vitin 2022 mbi 2.200 persona humbën jetën nga uria dhe sëmundjet e lidhura me kequshqyerjen. Në atë periudhë, deklaratat e ish-ministrit të Jashtëm të Ugandës, Henry Okello Oryem, shkaktuan reagime të forta pasi ai i quajti viktimat e urisë “idiotë”, duke argumentuar se vendi ka klimë të favorshme dhe tokë pjellore, dhe prandaj njerëzit duhet të ishin në gjendje të prodhonin vetë ushqimin.
Lajmi raportohet nga Top Channel.
