Jurgen Klopp pritet të bëhet trajneri i ri i përfaqësueses gjermane, pas një marrëveshjeje paraprake të arritur të premten më 10 korrik në New York, ku presidenti i DFB, Bernd Neuendorf, dhe zëvendës-presidenti Hans-Joachim Watzke u takuan me Klopp dhe agjentin e tij, Marc Kosicke. Një hap zyrtar tjetër, sipas mediave, është vendosja e kontratës para asamblesë së përbashkët të këshillit të survejimit dhe aksionerëve të Federatës.
Klopp pritet të firmosë një kontratë me Federatën Gjermane deri në përfundim të Botërorit 2030, duke përfshirë ciklin e plotë të kualifikueseve për Euro 2028 dhe për Botërorin që do të mbahet në Spanjë, Portugali dhe Marok. Pagesa e përcaktuar do të jetë rreth 7 milionë euro në vit për katër vjet, një nivel pak më i lartë se paga e paraardhësit Nagelsmann.
Përpara njoftimit zyrtar mbetet zgjidhja e kontratës së Klopp me Red Bull. Oliver Mintzlaff, shefi ekzekutiv i kompanisë, pritet të udhëtojë në New York për të negociuar me trajnerin dhe stafin e tij. Marrëdhëniet midis Mintzlaff dhe Federatës nuk janë të mira; në 2023 ai u anëtarësua në një “Këshill të të mençurve” për të ndihmuar ringritjen e kombëtares së bashku me emra si Rudi Völler, Karl-Heinz Rummenigge, Oliver Kahn dhe Matthias Sammer, por më vonë e braktisi grupin mes polemikash, duke argumentuar se nuk po funksiononte si duhet.
Në media është përmendur shpesh ekzistenca e një klauzole në kontratën e Klopp për të lejuar largimin në rast ftesë nga kombëtarja, por Mintzlaff e ka përgënjeshtruar këtë. Sipas deklarimeve, nuk ekziston asnjë klauzolë formale; në vend të saj ka një akord verbal mes Mintzlaff dhe Klopp që parashikon një largim pa penalitete dhe që Klopp të mbetet ambasador komercial i markës Red Bull.
Federata Gjermane e Futbollit lëshoi një komunikatë zyrtare që konfirmon bisedimet e para “të thella” në New York dhe njofton se u arritën dakordësi në pikat kyçe të një kontrate të mundshme. Bisedimet do të vazhdojnë javën e ardhshme, dhe të dyja palët shprehen se tratativat, në varësi të marrëveshjes me Red Bull, mund të mbyllen pozitivisht.
