Gazetari investigativ francez Romain Molina njoftoi në rrjetin social X se do të publikojë një hetim që e përshkruan si një nga skandalet më të mëdha të fshehura nga FIFA, duke pretenduar se në qendër të tij ndodhet “mafia e futbollit argjentinas”. Njoftimi shkaktoi reagime të shumta në rrjetet sociale dhe mediat sportive, por deri tani hetimi nuk është publikuar dhe nuk janë paraqitur dokumente, prova apo detaje konkrete që të mbështesin pretendimet e gazetarit.
Paralajmërimi vjen në një periudhë të ndjeshme për futbollin argjentinas. Mediat argjentinase, përfshirë La Nación, raportojnë se FBI dhe prokurorë federalë në Florida po hetojnë transaksione financiare të lidhura me Federatën Argjentinase të Futbollit (AFA), me dyshime për pastrim parash, mashtrim elektronik dhe evazion fiskal. Raportimet flasin për qarkullim të qindra milionë dollarëve dhe përdorim të kompanive guaskë, megjithëse nuk ka përfundime zyrtare mbi përgjegjësitë.
Në të njëjtën kohë, Argjentina iu nënshtrua polemikave sportive gjatë Kupës së Botës 2026, pasi vendime arbitrale në ndeshjet ndaj Kepit të Gjelbër dhe Egjiptit nxiti akuza për favorizim, duke ushqyer spekulimet në opinionin publik. Megjithatë, deri tani nuk ekziston asnjë konfirmim zyrtar që hetimi që Molina paralajmëroi lidhet me hetimet financiare ndaj AFA-së ose me polemikat e arbitrimit në Botëror.
Përmbajtja e dosjes së paralajmëruar mbetet e panjohur dhe pritet të publikohet në orët në vijim. Nëse pretendimet e Molina-s mbështeten me prova konkrete, futbolli argjentinas mund të përballet me një skandal të madh; deri atëherë, pretendimet që qarkullojnë mbeten në fazën e paralajmërimit dhe pritet publikimi i hetimit të plotë.
