Thibaut Courtois pranoi se nuk donte të largohej nga fusha në ndeshjen Spanjë–Belgjikë, por një problem muskulor e detyroi të braktiste lojën që vulosi eliminimin e Red Devils në çerekfinale. Pas ndeshjes portieri tha se “ndjeva diçka pas një rivënie të gjatë të topit, mendova se ishte vetëm tension muskular në bicepsin femoral pas shumë lëshimeve. Më pas ndjeva një përkeqësim, u ula për t’u vizituar nga mjeku” dhe se donte të vazhdonte, por “nuk ia dilja dot të shkelmoja mirë topin”. Trajneri i paralajmëroi se nëse nuk ishte në 100% do ta zëvendësonte; Courtois tha se i kishte treguar se nuk ndihej mirë por deshi ta tentonte edhe njëherë, duke menduar se duke evituar rivëniet e gjata mund të vazhdonte. Ai shtoi: “Por, është mirë kështu, nëse trajneri do një lojtar në 100% të formës është e drejtë që të jetë kështu”.
Në vend të tij hyri Senne Lammens, i cili bëri një kthim të shkurtër të topit që solli golin vendimtar të Merinos. Courtois mbrojti zëvendësimin duke thënë: “Kështu është futbolli, nuk është e nevojshme të kryqëzosh atë djalë, është një portier i shkëlqyer që ka bërë një sezon fantastik te Manchester United dhe nuk e meriton këtë”.
Përtej dëmtimit të portierit, pas ndeshjes në Belgjikë nisën kritika të forta ndaj trajnerit Rudi Garcia. Ish-trajneri i Napolit dhe Romës u akuzua nga opinionistë dhe komentatorë për gabimin me zëvendësimin e Courtois dhe për menaxhimin e burimeve të skuadrës, përfshirë ndryshimet në formacionin titullar në krahasim me ndeshjen ndaj SHBA-së, ku Garcia surprizoi me aktivizimin e Witsel. Pyetja që ngrihet është nëse alibia e dëmtimeve do të mjaftojë që francezi të mbetet në pankinë; arritja e çerekfinaleve të Botërorit mund ta favorizojë, por Federata Belge mund të rishqyrtojë vendimin, pas pak më shumë se një viti nga ndryshimi i fundit në pankinën e kombëtares.
