Futbolli i Afrikës së Jugut është tronditur nga vdekja e mesfushorit Jayden Adams, 25 vjeç, lajm i raportuar nga media sportive Soccer Laduma. Sipas raportimeve, përfaqësuesit dhe kujdestari i lojtarit kanë konfirmuar ngjarjen, por detajet rreth shkaqeve të vdekjes mbeten ende të paqarta. Nëse lajmi konfirmohet zyrtarisht nga autoritetet ose nga klubi, kjo ngjarje ndodh vetëm pak ditë pasi Adams luajti një rol kyç me kombëtaren e Afrikës së Jugut në Kupën e Botës, duke ndihmuar ekipin të arrijë për herë të parë fazën me eliminim direkt të turneut.
Mentori i tij, Brendine Johnson, konfirmoi lajmin për Soccer Laduma dhe kërkoi respekt për privatësinë e familjes. Johnson tha: “Në këtë moment gjithçka është ende shumë e freskët. Familja nuk dëshiron të kontaktohet. Kjo humbje na ka tronditur të gjithëve. Kisha folur me të të enjten dhe ishte shumë optimist për rikthimin pas Kupës së Botës. Askush nuk e priste këtë.”
Lajmi është po aq i dhimbshëm duke pasur parasysh se gjatë Botërorit Adams kishte përjetuar një tjetër tragjedi personale: sipas ish-kapitenit Doctor Khumalo, mesfushori mori vesh për vdekjen e gjyshes vetëm pak orë para ndeshjes së fazës së grupeve kundër Çekisë, më 18 qershor në Atlanta. Pavarësisht dhimbjes, Adams vendosi të luante dhe ndihmoi Afrikën së Jugut të siguronte një barazim 1-1, rezultat që mbajti gjallë shpresat për kualifikim. Më pas kombëtarja arriti një fitore historike ndaj Koresë së Jugut, përfundoi e dyta në Grupin A dhe kualifikoi për herë të parë në fazën me eliminim direkt të Kupës, ku do të përballej me Kanadanë.
Doctor Khumalo e vlerësoi Adams si një futbollist me profesionalizëm të jashtëzakonshëm, që vazhdoi të jepte maksimumin në fushë edhe në rrethana personale të vështira. Deri tani nuk janë publikuar shkaqet e vdekjes së 25-vjeçarit, dhe pritet një reagim zyrtar nga klubi i tij, Mamelodi Sundowns, si dhe nga Federata e Futbollit e Afrikës së Jugut.
