Apple ka paditur OpenAI në Gjykatën Federale të Kalifornisë Veriore, duke e akuzuar për përvetësim të sekreteve tregtare dhe shkelje kontrate. Në padinë e saj, kompania thotë se OpenAI ka përdorur informacione konfidenciale të Apple për të zhvilluar pajisjet e reja të inteligjencës artificiale që pritet t’i prezantojë më vonë gjatë këtij viti. Apple pretendon se i ka ngritur shqetësimet pranë OpenAI që në fazat e para të hetimit, por se nuk ka marrë asnjë përgjigje.
Në qendër të padisë janë dy ish-punonjës të Apple, Chang Liu dhe Tang Tan, të cilët më pas iu bashkuan OpenAI. Sipas dokumentave të paraqitura, Liu mori dhjetëra dokumente konfidenciale që përmbanin informacione mbi produkte të papublikuara, specifikime teknike dhe projekte të brendshme. Padia thotë se ai nuk dorëzoi laptopin e punës dhe se dyshohet se ka hyrë në kompjuterin e një ish-kolegu pas largimit nga kompania. Po ashtu, Apple pretendon se Tan përdori informacione të brendshme gjatë rekrutimit të punonjësve dhe ndau me OpenAI të dhëna mbi furnitorët dhe projektet e kompanisë.
Padia përfshin edhe io Products, kompaninë e themeluar nga ish-shefi i dizajnit të Apple, Jony Ive, të cilën OpenAI e bleu vitin e kaluar. Megjithatë, Apple nuk e padit Ive-n dhe nuk e akuzon atë për ndonjë shkelje. Nga ana e saj, OpenAI ka mohuar kategorikisht akuzat, duke deklaruar se nuk ka interes për sekretet tregtare të kompanive të tjera dhe se fokusohet në zhvillimin e teknologjive inovative.
Padia vjen ndërsa rivaliteti mes Apple dhe OpenAI është intensifikuar, pavarësisht një partneriteti të shpallur në vitin 2024 për integrimin e ChatGPT në produktet e Apple. Të dyja kompanitë po konkurrojnë për dominim në tregun e inteligjencës artificiale: OpenAI po investon në pajisje të reja hardware-i, ndërsa Apple po përgatit një version më të avancuar të ndihmës virtuale Siri. Top Channel.
