Sonte në “Hard Rock Stadium” të Majamit, Anglia dhe Norvegjia përballen për një vend në gjysmëfinalet e Kupës së Botës 2026, në një duel që shënon për herë të parë takimin e dy kombëtareve në një fazë finale botërore. “Tre Luanët” hyjnë në këtë ndeshje pas fitore spektakolare 3-2 ndaj Meksikës, ku Jude Bellingham shënoi dy gola, ndërsa Harry Kane vulosi kualifikimin nga pika e bardhë. Anglezët do të jenë pa mbrojtësin Jarrell Quansah, i pezulluar për shkak të kartonit të kuq.
Norvegjia paraqitet si surpriza më e madhe e këtij Botërori, pas eliminimit të Brazilit, pesë herë kampion bote, falë dopietës së Erling Haaland. Ky sukses solli për herë të parë në histori kualifikimin e Norvegjisë në një çerekfinale të një turneu të madh. Haaland ka shënuar në çdo ndeshje të Norvegjisë në këtë kampionat dhe kryeson garën për “Këpucën e Artë”.
Historia përballjeve favorizon Anglinë: nga 11 takime, anglezët kanë regjistruar gjashtë fitore ndaj vetëm dy sukseseve të norvegjezëve. Takimi i fundit mes tyre, në vitin 2014, përfundoi me fitore të Anglisë përmes një goli të Wayne Rooney. Megjithatë, vëmendja e përqendruar tek dy sulmuesit kryesorë; përveç Haalandit, Harry Kane ka realizuar gjashtë gola në turne, duke vërtetuar rolin e tij si udhëheqës i Anglisë në ndeshjet me eliminim.
Anglia renditet e katërta në tabelën botërore dhe është e pamposhtur në gjashtë ndeshjet e fundit, prandaj njihet si favorite përballë Norvegjisë. Norvegjia, megjithatë, ka treguar mungesë frike dhe pas eliminimit të Brazilit beson se mund të vazhdojë të shkruajë historinë duke sfiduar anglezët. Ndeshja pritet të jetë përplasja kryesore e mbrëmjes, me pasojat e saj që do të përcaktojnë një prej pjesëmarrëseve në gjysmëfinale.
