Qendra Kombëtare për Internet të Sigurt (iSIGURT.al) identifikoi dhe raportoi për heqje 42,624 materiale (foto dhe video) me përmbajtje të abuzimit seksual të fëmijëve vetëm gjatë muajit qershor 2026. Evidentimi nisi nga një raportim për një profil në platformën Telegram që shpërndante përmes mesazheve një adresë të vetme. Pas verifikimeve, analistët e iSIGURT.al përdorën sistemin e avancuar të qendrës për të evidentuar materialet. Faqja me domain .AL, që paraqitej si forum diskutimi, kishte si qëllim real shpërndarjen e fotografive dhe videove të fëmijëve me përmbajtje dhune dhe abuzimi seksual.
Drejtori i CRCA Shqipëri, Altin Hazizaj, vuri në dukje se fakti që një adresë e vetme shfaqi mbi 42 mijë materiale brenda një muaji është jashtëzakonisht alarmues dhe tregon se Shqipëria nuk është e paprekshme nga këto forma kriminaliteti, duke kërkuar masa më të forta për monitorimin e internetit, hetimin e autorëve dhe mbrojtjen e fëmijëve. iSIGURT.al e klasifikon rastin si një nga më të rëndët e konstatuara deri më sot dhe thekson shqetësimet mbi përdorimin e infrastrukturës shqiptare të internetit për shpërndarjen e materialeve që dokumentojnë abuzimin seksual të fëmijëve.
Gjatë vitit të kaluar, iSIGURT mbylli me sukses tre profile chat-i në Telegram dhe Discord me mbi 30,000 anëtarë, ku shpërndaheshin foto intime të vajzave dhe grave nga Shqipëria, të përdorura për shantazh, kërcënim dhe nxitje të dhunës me bazë gjinore. Organizata kujton se çdo foto apo video me përmbajtje të abuzimit seksual të një fëmije përbën provë të një krimi dhe shënjon një fëmijë viktimë që riviktimizohet sa herë materiali shikohet apo shpërndahet.
Menjëherë pas identifikimit, iSIGURT.al raportoi materialet pranë autoriteteve për bllokim dhe nisje të procedurave hetimore. Rasti evidenton nevojën urgjente për forcimin e monitorimit të faqeve me domain .AL; iSIGURT po nxit bashkëpunim më të shpejtë ndërmjet autoriteteve, ofruesve të internetit dhe kompanive të hostimit në Shqipëri, në bashkëpunim me AKEP.
