Këshilli i Lartë Gjyqësor (KLGJ) ka rrëzuar kërkesat e disa ish-anëtarëve të institucioneve të Vettingut për emërim si gjyqtarë në Gjykatën e Apelit të Juridiksionit të Përgjithshëm. Sipas raportimit të Anila Hoxhës, vendimi u mor gjatë mbledhjes plenare të zhvilluar këtë të premte, ku KLGJ shqyrtoi disa çështje që lidhen me funksionimin e sistemit gjyqësor. Në po të njëjtën mbledhje, Këshilli miratoi raportin e vlerësimit etik dhe profesional për gjyqtaren Brunilda Kadi për vitin 2024, ndërsa shtyu shqyrtimin e projektvendimit për vlerësimin etik dhe profesional të gjyqtarit Adrian Shega për periudhën 2021–2023.
KLGJ vendosi gjithashtu caktimin me short të relatorit për procedimin disiplinor ndaj gjyqtares së Gjykatës së Shkallës së Parë të Juridiksionit të Përgjithshëm Gjirokastër, Suela Dashi. Një tjetër vendim lidhej me gjyqtarin Sokol Ibi, për të cilin u miratua zgjatja e afatit të caktimit në skemën e delegimit dhe ricaktimi i tij në Gjykatën Administrative të Apelit. Këshilli vendosi rrëzimin e kërkesave për caktim në pozicionin e gjyqtarit në Gjykatën e Apelit të Juridiksionit të Përgjithshëm për: Suela Zhegu, Firdes Shuli, Alma Faskaj, Brunilda Bekteshi, Pamela Qirko, Olsi Komici, Valbona Sanxhaktari, Xhensila Pine, Etleda Çiftja dhe Roland Ilia.
Pas hedhjes së shortit, KLGJ vendosi zëvendësimin e nëpunëses përgjegjëse për vlerësimin etik dhe profesional të gjyqtarëve, Merita Karaj. Në mbledhje u deklarua e përfunduar, pa një vendim përfundimtar, procedura e verifikimit të pasurisë dhe figurës për kandidaten Kledjana Llalla, e cila kishte aplikuar për programin e formimit fillestar në Shkollën e Magjistraturës për vitin akademik 2026–2027, në profilin ndihmës ligjor. KLGJ gjithashtu shtyu shqyrtimin e projektvendimit për rishpërndarjen e fondeve buxhetore të gjykatave për vitin 2026. Në përfundim të mbledhjes, Këshilli miratoi procesverbalet e mbledhjeve të datave 29 prill dhe 6 maj 2026.
