Ish-sulmuesi i Anglisë Gary Lineker kritikoi ashpër presidentin e FIFA-s, Gianni Infantino, pas vendimit të federatës për të pezulluar dënimin me një ndeshje të sulmuesit amerikan Folarin Balogun. Balogun ishte ndëshkuar me karton të kuq në fitoren 2-0 të SHBA-së ndaj Bosnje-Hercegovinës, por vendimi i FIFA-s e lejoi atë të luante në ndeshjen e 1/8-ave ndaj Belgjikës. Ky vendim solli presion të madh mbi Infantinon dhe reagime të ashpra, veçanërisht duke pasur parasysh se mbrojtësi anglez Jarrell Quansah u dënua me dy ndeshje pas kartonit të kuq ndaj Meksikës, duke humbur çerekfinalen e Anglisë ndaj Norvegjisë dhe, në rast kualifikimi, edhe gjysmëfinalen.
Kontestimet u shtuan kur presidenti amerikan Donald Trump deklaroi se kishte kërkuar nga FIFA rishikimin e çështjes së Balogun, çka ngriti dyshime për ndikim politik në vendimmarrjen e institucionit. Në emisionin “The Rest is Football”, Lineker tha se pozicioni i Infantinos në krye të FIFA-s ishte “pothuajse i paqëndrueshëm” dhe e konsideroi situatën një skandal që jep një imazh shumë të keq për federatën. Ish-mesfushori i Chelseat, Joe Cole, e krahasoi Infantinon me personazhin komik Basil Fawlty, duke thënë se ai ka vetëm një punë, por e prish vetë atë. Micah Richards e përshkroi trajtimin e rastit të Balogun si “një farsë absolute”.
Edhe organet zyrtare reaguan: UEFA e quajti vendimin e FIFA-s “të pakuptueshëm” dhe tha se ai kishte “kaluar vijën e kuqe”. Federata Belge e Futbollit shfaqi pakënaqësi dhe kërcënoi me veprime ligjore, duke u shprehur e “habiturr” nga ky vendim i paprecedentë. Megjithatë, polemika nuk ndryshoi rezultatin e ndeshjes: Balogun pati një paraqitje të zbehtë dhe Shtetet e Bashkuara u eliminuan pas humbjes 4-1 ndaj Belgjikës.
